Tetë shpërthime janë dëgjuar sot në Riad, kryeqytetin e Arabisë Saudite, sipas gazetarëve të AFP-së, pak pasi autoritetet dërguan mesazhe paralajmëruese për një kërcënim të mundshëm sulmi ajror.

Ngjarja vjen në një klimë të tensionuar sigurie, pas sulmeve të përsëritura të rebelëve Huthi të Jemenit, të mbështetur nga Irani, ndaj mbretërisë saudite.

Përmes mesazheve të shkurtra në telefonat celularë, autoritetet paralajmëruan banorët e Riadit për një “kërcënim ajror armiqësor”, duke u kërkuar të tregojnë kujdes dhe të ndjekin njoftimet zyrtare.

Ndërkohë, Mbrojtja Civile e Arabisë Saudite lëshoi paralajmërime edhe për një “rrezik potencial” në Kharj, qytet në juglindje të Riadit, si dhe në Najran, në jug të vendit.

Deri në momentin e raportimit, nuk janë bërë të ditura detaje të plota mbi shkakun e shpërthimeve, dëmet e mundshme apo nëse ka persona të lënduar. Autoritetet saudite pritet të japin informacione të mëtejshme për situatën e sigurisë.