Një sulm i rrallë me shpatë në lindje të Londrës la të martën të paktën katër persona të plagosur dhe një të mitur 13-vjeçar të vdekur, ndërsa autori u arrestua nga policia në vendngjarje. Në mediet britanike qarkulloi videoja e ngjarjes së rëndë, ku 36-vjeçari pas mbërritjes me automjet në një zonë të banuar, nisi të sulmojë kalimtarët, të cilët ndodheshin pranë stacionit të nëndheshëm të Hainosë.
Policia Metropolitane njoftoi se fillimisht rreth orës 6:25 ishte lajmëruar për një makinë, e cila ishte përplasur me një shtëpi. Me të mbërritur, agresori u përball edhe me tre oficerë të policisë, duke i kërcënuar për t’i goditur ata me mjetin e tij prerës. Dy oficerë do i nënshtrohen ndërhyrjeve kirurgjikale për plagët e marra, por ata ndodhen jashtë rrezikut për jetën sikundër edhe dy qytetarët e tjerë.
Policia tha se ngjarje nuk kishte qëllime terroriste.
“Është një incident shokues. Dua të falënderoj shërbimet e emergjencës për reagimin dhe guximin e policisë në vendngjarje. Kjo dhunë nuk ka vend në rrugët tona,” reagoi kryeministri britanik, Rishi Sunak.
Numri i krimeve që përfshijnë përdorimin e thikave në Londër u rrit me 20 për qind në 14.577 vitin e kaluar nga 12.119 në vitin e mëparshëm, por shifra është më e ulët sesa gjatë kohës së pandemisë, kur arriti 14.680 në mars 2020. / The Guardian