Pamjet e shfaqura në CCTV konfirmuan atë që shumë njerëz në industrinë e muzikës e dinin se do te ndodhte: koha kur krimi ndeshkohet – për një nga artistët më me ndikim të hip-hop-it në histori, sipas BBC.
Pamjet ku Sean “Diddy” Combs shihet duke shkelmuar ish të dashurën e tij Cassie Ventura – ndërsa ajo shtrihej e palëvizur në dysheme – “çimentuan” rënien e reputacionit të tij, pavarësisht se ai kërkoi falje pasi videoja u bë virale.
Reputacioni i Combs në industri ishte “i tronditur prej disa kohësh”, tha Amy DuBois Barnett, ish-kryeredaktore e revistës “Ebony”, e cila ka shkruar për kulturën hip-hop.
“Shumë njerëz ishin të vetëdijshëm për temperamentin e tij mjaft të shfrenuar”, shtoi ajo.
Combs – i njohur më parë si P. Diddy, Puff Daddy ose Puffy – është një nga artistët më të vlerësuar të të gjitha kohërave, me tre çmime “Grammy” dhe miliona shitje rekord.
“Për vite me radhë, asgjë nuk ndikoi vërtet në statusin e ikonës si artist, producent dhe biznesmen. Kishte histori negative në industri, por shumë prej tyre qëndruan larg syrit të publikut”, tha Barnett.
Nëntorin e kaluar, Ventura tërhoqi padinë kundër Combs – në të cilën ajo e akuzonte për përdhunim dhe trafikim dhe shfrytëzim seksual – për një shumë të pazbuluar.
Por, avokati i Combs tha se marrëveshja nuk ishte “në asnjë mënyrë një pranim i akuzave”.
Shumë artistë të famshëm vazhduan të shprehnin mbështetje për të, por e gjithë kjo përfundoi me daljen e pamjeve të siguruara nga CNN dhe të publikuara javën e kaluar.
Sulmi i treguar në pamje është brutal.
Një varg padish të tjera janë ngritur që atëherë kundër Combs për abuzim, ngacmim seksual dhe përdhunim.
Padia e fundit u paraqit dje nga Crystal McKinney, një ish-modele dhe fituese e konkursit të MTV-së “Model Mission 1998”.
Ajo pretendoi se ishte “droguar dhe ngacmuar seksualisht” në vitin 2003 nga Combs pas një eventi mode në Nju Jork.
Kur u ngritën paditë e para, reperi i quajti akuzat “të neveritshme” duke thënë se viktimat e supozuara po kërkonin të përfitonin para.
Por videoja e sulmit ndaj Ventura i minoi këto mohime.
Combs heshti për dy ditë pas publikimit të pamjeve, përpara se të postonte një video në Instagram ku ai kërkonte falje, duke pranuar se ishte ai në videon e regjistruar dhe se veprimet e tij ishin “të pafalshme”.
Barnett, e cila ka shkruar për mizogjininë në industrinë e Rap-it, e përshkroi deklaratën e tij si “faljen më të pamenduar ndonjëherë”.
“Askush nuk po e merr seriozisht, veçanërisht pasi ai akuzoi më herët Cassie dhe të tjerët si “gërmues të arit”.
Kjo me të vërtetë zemëroi shumë njerëz në industrinë e muzikës.
