Prej më shumë se 24 orësh, situata nga zjarret në zonën e Trodhenes në Njësinë Administrative Ulëz të Bashkisë Mat, vijon të jetë kritike.

Tre vatra zjarri janë aktivizuar në zonë pavarësisht angazhimit të forcave në terren dhe ndërhyrjes nga ajri gjatë ditës së djeshme, nuk ka qenë e mundur izolimi i flakëve.

Era e fortë, temperaturat e larta dhe terreni i vështirë malor kanë favorizuar përhapjen e shpejtë të zjarrit, duke e nxjerrë situatën jashtë kontrollit.

Sipas informacionit të marrë në terren, rrezikohen disa banesa në fshatin Lundre, pasi flakët po përhapen në drejtim të banesave, si nga zona e Trodhenes ashtu edhe nga Lundreja.

Terreni i vështirë e bën pothuajse të pamundur ndërhyrjen e mjeteve zjarrfikëse, ndërsa punonjësit e Bashkisë Mat, shërbimi zjarrfikës dhe punonjësit e shërbimit pyjor po vijojnë përpjekjet për të izoluar dhe shuar flakët.

Autoritetet vendore kanë kërkuar sërish mbështetje nga ajri, për shkak të pamundësisë së ndërhyrjes efektive nga toka.

Ndërkohë, policia po punon për identifikimin dhe kapjen e autorit ose autorëve, pasi zjarret dyshohet se janë të qëllimshme.