Nënkryetari i Kuvendit, Agron Gjekmarkaj, i cili humbi ndjenjat gjatë protestës së opozitës, në kuadrin e mosbindjes civile, konfirmon se ajo që ndodhi është pasojë e përplasjes me policinë e shtetit.
Gjekmarkaj ndodhej në zonën e Pallatit me Shigjeta, një nga 5 pikat që u bllokuan në Tiranë.
“Jam shtyrë nga policia. Më kanë vënë duart në gjoks dhe kam ngelur pa frymë”, shprehet Gjekmarkaj, teksa komunikon me kreun demokrat Sali Berisha në dhomën e spitalit, ku shkoi për ndihmë të specializuar mjekësore.
Pamjet nga dhoma e spitalit janë siguruar nga gazetari i News24, Osman Stafa.
Ndërkohë kreu i degës së PD-së për Lezhën, Gjin Gjoni, shprehet se ai u rrëzua me kokë. “Ra me kokë, isha pranë tij”, thekson Gjin Gjoni.
Gjekmarkaj në vijim të bashkëbisedimit shprehet se në momentin që është rrëzuar nuk mban mend gjë. E gjithë situata duket se ka ndodhur në momentin që Policia ka ndërhyrë për të zhbllokuar rrugën nga protestuesit. Policia në deklaratën zyrtare shprehet se nuk ka ushtruar dhunë.
