TIRANE- Partia Demokratike ka ritheksuar se çështja e përgjimit është e paligjshme, duke e cilësuar, “krim i krimeve”. Në një deklaratë për mediat, zëdhënësja e PD, Ina Zhupa, tha se kryeministri Rama “nuk do të mundë ta mbyllë këtë aferë”, siç ka bërë sipas tye me aferat e tjera.
DEKLARATA E PLOTE
Përgjimi i paligjshëm nuk është një nga tenderat e Beqës, apo pazaret e Ahmetajt, që Edi Rama shpreson ti mbyllë me planin që ka për të kapur e për të vënë nën kontroll çdo prokuror e gjykatës.
Nuk është as një nga krimet e shpeshta të Tahirit, që Edi Rama kërkon të mbyllë duke synuar vënien nën urdhrat e tij të drejtësisë.
Eshtë më shumë se aferat e tij, se tenderat e paracaktuar, se kulla me qendrën tregtare Qemal Stafa.
Eshtë krimi më i rëndë i këtyre 3 viteve, krim shtetëror që cënon sigurinë kombëtare, shkel brutalisht Kushtetutën, liritë e të drejtat themelore të njeriut.
Edi Rama ia doli përmes kërcënimeve mafioze ndaj gjykatës të shpëtojë për momentin një nga hallkat e krimit, drejtorin Cako.
Po ai nuk do të mundet kurrë të lajë duart nga kjo aferë skandaloze, më e rënda e bilancit të tij të pasur me krim e korrupsion.
Partia Demokratike i bën dhe një herë thirrje prokurorisë dhe gjykatave, të mos bien pre e shantazhit mafioz të Edi Ramës.
Përgjimi i paligjshëm është prova e madhe e vendit.
Nga kjo varet, a do të kemi shtet ligjor, apo shtet mafioz brenda shtetit.
Do të kemi ligj, apo rregullat e mafias në fuqi.
Do të kemi demokraci e garanci për të drejtat e qytetarëve, apo sundim bande.
(el.sp/BalkanWeb)
