Autoritetet e Floridës kryen ekzekutimin e të burgosurit të dënuar me vdekje Melvin Trotter të martën , gati katër dekada pas vrasjes së 70-vjeçares Virgie Langford në vitin 1986, ku 65-vjeçari u ekzekutua me injeksion vdekjeprurës. Ishte ekzekutimi i katërt në Shtetet e Bashkuara këtë vit dhe i dyti në shtet.

Trotter u ekzekutua në orën 6:15 pasdite sipas orës lokale, sipas Departamentit të Korrektimeve. Ai u dënua me vdekje më 23 janar 2026 për vrasjen e Virgie Langford dhe ishte dënuar me vdekje dy herë për të njëjtin krim.

Vrasja ndodhi më 16 qershor 1986, në dyqanin ushqimor Langford’s në Palmetto. Trotter ishte nën arrest shtëpiak për një dënim të mëparshëm për vjedhje me thyerje.

Prokurorët thonë se ai priti jashtë dyqanit derisa të largohej klienti i fundit. 70-vjeçarja ishte vetëm në pjesën e prapme të dyqanit, ku ajo po priste mish.

Trotter, i cili ishte diagnostikuar me prapambetje mendore nga një psikolog, hyri në dyqan dhe filloi të kontrollonte arkën, duke rrëmbyer kupona ushqimorë dhe rreth 100 dollarë, të cilat, sipas raportimeve të asaj kohe, ai kishte ndërmend t’i përdorte për të blerë drogë.

Nuk është e qartë nëse Langford doli nga mbrapa apo nëse sulmuesi iu afrua asaj, por prokurorët thanë se ai e goditi shtatë herë me thikë kasapi përpara se të ikte. Gruaja u vu re nga një shofer kamioni, i cili njoftoi autoritetet.

Trotter u deklarua fajtor në vitin 1987 dhe mbeti në pritje të dënimit me vdekje për gati katër dekada.