Jenson Lu jetën e tij e ka rreth Pokémon. 26-vjeçari ka luajtur lojën mobile Pokémon Go çdo ditë për një dekadë, ndjek çdo javë serialin e animuar dhe çdo javë shkon në dyqanin lokal në periferi të Los Anxhelosit për të luajtur lojën e kartave të tregtisë së Pokémon. Koleksioni i tij i kartave arrin vlerën e mbi 70,000 dollarë.

“Nuk më kujtohet kur ka qenë dita e fundit që nuk kam menduar fare për Pokémon,” tha Lu. Që nga debutimi në Japoni më 1996 me lojën Pokémon Red dhe Pokémon Green për Nintendo Game Boy, franchise-ja ka pushtuar globin me serialet e saj, lojërat mobile dhe kartat e koleksionistëve. Popullariteti i saj vazhdon, duke mbajtur fansat e rinj dhe të rritur të angazhuar.

“Pokémon ofron një mësim të shkëlqyer në dizajnin e personazheve, gjë që e bën kaq të qëndrueshëm,” tha Heather Cole, lektore ndihmëse e dizajnit të lojërave dhe mediave interaktive në West Virginia University.

Nuk është vetëm bukuria që i bën njerëzit të duan produktet e Pokémon, veçanërisht kartat e tregtisë. Disa prej tyre janë aq të çmuara sa ylli i mediave sociale, Logan Paul, shiti një kartë për një rekord prej 16.5 milionë dollarësh. Në Kaliforni Jugore, entuziazmi për kartat Pokémon ka çuar në disa grabitje në dyqane kartash, duke shkaktuar humbje prej qindra mijëra dollarësh dhe madje disa koleksionistë janë grabitur me armë.

Adam Corn, pronar i biznesit të kartave Overdose Gaming Inc, tha se ka mundur të blejë një shtëpi vitin e kaluar falë kartave Pokémon.

“Pokémon pothuajse gjithmonë rrit vlerën me kohën”,- tha Corn. “Pra, për mua është një vend shumë i mirë për të investuar, më mirë se shumë pasuri të tjera.”

Kompanitë si Beckett Grading Services dhe Professional Sports Authenticator autentifikojnë dhe klasifikojnë kartat Pokémon nga 1 deri në 10, ku 10 është gjendja perfekte dhe merr çmimet më të larta. Logan Paul bleu pak më parë kartën PSA Grade 10 Pikachu Illustrator për 5.3 milionë dollarë dhe e mbante në varëse rreth qafës. Ajo paraqet një Pikachu që mban një laps dhe një furçë shkrimi.

Të martën e kaluar, hajdutët vodhën më shumë se 80,000 dollarë karta Pokémon nga dyqani Do-We Collectibles në Anaheim – hera e dytë që dyqani sulmohet. Dyqane të tjera rreth Los Anxhelosit dhe Nju Jorkut gjithashtu janë synuar nga grabitësit.

Duy Pham, pronar i dyqanit në Anaheim, tha se përfitimet financiare të kartave për grabitësit dhe tregtarët e paligjshëm nënkuptojnë që “hobi nuk do të jetë më i njëjti.”

“Kjo është më e vështirë për koleksionistët dhe lojtarët”,- tha Pham. “Është e vështirë të gjejmë ndonjë gjë.”

Koleksionistët mund të paguajnë çmimin e pakos standarde me karta të rastësishme, rreth 5 dollarë për 10 karta, ose të blejnë kartën e dëshiruar dytësore për çmime më të larta. Por ashtu si në lojërat e fatit, hapja e paketave nuk garanton fitim – Aiden Zeng shpenzoi 1,000 dollarë për paketa që në treg ishin vetëm me vlerë 60 dollarë.

Zeng, 17 vjeç, tha se adhurimi i tij filloi në shkollën fillore, kur ai fiksonte mbi librat udhëzues të personazheve. Ai synonte të mbledhë çdo kartë të mundshme për personazhin e tij të preferuar, Black Kyurem.

“Kam mësuar çdo veprim të çdo Pokémoni, nga cila rajon vjen dhe pak nga historia e tij,” tha Zeng. Ai vuri re edhe një ringjallje të popullaritetit të Pokémon në shkollën e tij në Toronto, ku disa nxënës dekorojnë kapakët e telefonave me karta speciale ose me efekt holografik.

Krijuesi i Pokémon, Satoshi Tajiri, ka thënë se ai ka shijuar kapjen e insekteve dhe krijesave të tjera në fushat dhe pyjet pranë qytetit të tij në periferi të Tokios. Këto krijesa e frymëzuan të krijojë Pokémon-t e mrekullueshëm dhe fantastikë, sot me mijëra specie.

Edhe pse hobi i Lu-së është fitimprurës, tërheqja kryesore për të mbetet nostalgjia për personazhet me të cilët ka rritur dhe komuniteti që ka formuar rreth Pokémon. Ai preferon të mos shesë kartat e tij të veçanta, për shkak se frikësohet se nuk do t’i gjejë më kurrë.

Së fundmi, Lu kaloi një të shtunë të tërë duke ecur rreth Rose Bowl në Pasadena, Kaliforni, duke kërkuar Pokémon përmes lojës së tij me realitet të shtuar, në një ngjarje ku morën pjesë mijëra njerëz. “Kam dashur Pokémon që nga fëmijëria”,- tha ai. “Dhe ende e dua po aq shumë.”