Australia do të vendosë një aeroplan ushtarak zbulimi me rreze të gjatë veprimi në Gjirin Persik për të mbrojtur civilët, tha të martën kryeministri Anthony Albanese.
Një avion E-7A Wedgetail dhe personel mbështetës i forcave mbrojtëse do të dërgohen për një periudhë fillestare prej katër javësh për të ndihmuar në “mbrojtjen dhe sigurimin e hapësirës ajrore mbi Gjirin Persik”, tha Albanese në një konferencë për shtyp.
Australia gjithashtu planifikon të ofrojë raketa të avancuara ajër-ajër me rreze të mesme veprimi në Emiratet e Bashkuara Arabe “në përgjigje të një kërkese”, tha kryeministri.
Emiratet e Bashkuara Arabe, në të cilat ka rreth 24,000 australianë, kanë rrëzuar më shumë se 1,500 raketa dhe dronë të qëlluar nga Irani në hakmarrje pas sulmeve SHBA-Izrael, tha ai.
Albanese tha se vendosi të dërgojë aeroplanin e avancuar të mbikëqyrjes me radar në Gjirin Persik pas një diskutimi me presidentin e Emirateve të Bashkuara Arabe, Mohammed bin Zayed Al Nahyan.
“Prioriteti i parë i qeverisë sime është, dhe gjithmonë do të jetë, të mbaj australianët të sigurt”, tha kryeministri.
“Ndihma për australianët do të thotë gjithashtu të ndihmosh Emiratet e Bashkuara Arabe dhe vendet e tjera të Gjirit për t’u mbrojtur nga ato që janë sulme të paprovokuara”, shtoi ai.
“Qeveria ime ka qenë e qartë se nuk po ndërmarrim veprime sulmuese kundër Iranit dhe kemi qenë të qartë se nuk po vendosim trupa australiane në terren në Iran.”
Qeveria thotë se ka rreth 115,000 shtetas australianë në të gjithë Lindjen e Mesme, nga të cilët rreth 2,600 janë kthyer në shtëpi.
“Mbeten sfida të rëndësishme dhe po punohet më tej për të mbështetur ata që ende kërkojnë të largohen”, tha Albanese.
Australia tha javën e kaluar se kishte vendosur një aeroplan të rëndë transporti dhe një aeroplan transporti karburanti në Lindjen e Mesme, si pjesë e planeve për të nxjerrë qytetarët e saj nga rajoni.
Canberra është treguar e kujdesshme të bëjë të qartë se forcat e saj nuk po angazhohen në operacione sulmuese kundër Iranit.
Të premten, Albanese zbuloi se personeli ushtarak australian ishte në bordin e një nëndetëseje amerikane që fundosi një anije të marinës iraniane në Sri Lanka.
Personeli ishte në nëndetëse si pjesë e marrëveshjeve të trajnimit sipas AUKUS, një pakt mbrojtës shumëdekadësh me Britaninë dhe Shtetet e Bashkuara, tha ai, duke theksuar se ata nuk morën pjesë në sulm.
