Presidenti i Republikës, Bajram Begaj, uroi sot besimtarët bektashinj me rastin e Sulltan Novruzi, duke përcjellë një mesazh për më shumë paqe, shpresë dhe harmoni në shoqërinë shqiptare.

Me këtë rast, Kreu i Shtetit zhvilloi një vizitë në Kryegjyshata Botërore Bektashiane, ku u prit nga Kryegjyshi Botëror, Edmond Brahimaj. Presidenti i përcolli atij urime të përzemërta, ndërsa theksoi rëndësinë që kjo festë mbart për besimtarët bektashinj dhe për mbarë shqiptarët.

Në fjalën e tij, Begaj u shpreh se Sulltan Novruzi është një ditë që duhet të shërbejë si thirrje për reflektim dhe bashkim.

“Gëzuar Sulltan Novruzin! Jam këtu te Kryegjyshata Botërore, së bashku me Baba Edmond Brahimaj, për t’u uruar festën e Sulltan Novruzit të gjithë besimtarëve bektashinj, por edhe të gjithë shqiptarëve, që të kenë paqe, begati dhe lumturi në jetën e tyre,” – deklaroi Presidenti.

Ai theksoi gjithashtu se kjo festë përkon me ditëlindjen e Imam Aliu dhe përfaqëson vlera që duhet të mishërohen në jetën e përditshme.

“Sulltan Novruzi është lindja e pranverës, lindja e shpresës dhe e dritës mbi errësirën. Vlerat e paqes, dhembshurisë, dashurisë, solidaritetit dhe besimit për një të ardhme më të mirë duhet të na udhëheqin në çdo ditë të vitit,” – u shpreh Begaj.