Kryeministrja italiane Giorgia Meloni iu referua në deklaratat e saj rastit të Nicole Minetti-t , e cila dyshohet se u fal nga Presidenti i Republikës Italiane Sergio Mattarella pa u përmbushur kushtet e kërkuara.

“Unë i besoj Ministrit të Drejtësisë Carlo Nordio, përjashtoj dorëheqjen e tij të mundshme. Ne biseduam së bashku dhe iu referuam fazave të ndryshme të këtij rasti”, tha Meloni.

“Nuk mund të them se është bërë ndonjë gjë e gabuar krahasuar me 1,245 kërkesat e tjera për falje në vitet e fundit. Vetëm atëherë dolën elementë të rinj, të ndryshëm”, shtoi Meloni.

Siç raporton shtypi, presidenti italian nuk është përgjegjës sepse ai u mbështet në mendimin pozitiv të Ministrit të Drejtësisë dhe të prokurorisë së Milanos.

Kërkesa përkatëse për falje bazohej në kujdesin e supozuar të një të mituri dhe nevojën për t’i ofruar atij trajtim të vazhdueshëm mjekësor. Megjithatë, në artikujt në shtypin italian, ky justifikim konsiderohet i rremë dhe mashtrues.

Kujtojmë se Nicole Minetti është dënuar për përvetësim parash, si dhe për nxitje të prostitucionit, në kuadër të çështjes “Bunga-Bunga” . Pas zbulimeve të fundit të gazetës Il Fatto Quotidiano, Prokuroria e Përgjithshme e Milanos ka nisur një hetim të ri për të verifikuar kushtet mbi të cilat është bazuar falja, në bashkëpunim me Interpolin.