Sektori i transportit në Bolivi u paralizua praktikisht të martën, me transportin publik që u ndal në qytetet kryesore dhe mbylljen e rrugëve në të gjithë vendin për shkak të mungesës së karburantit dhe cilësisë së dobët.

Në kryeqytet, La Paz, dhe qytete të tjera të mëdha, përfshirë Sucre dhe Cochabamba, shoferët e autobusëve, minibusëve dhe taksive morën pjesë në një grevë kombëtare , raportoi Agence France-Presse, duke cituar mediat boliviane.

Kompania shtetërore Administradora Boliviana de Carreteras (ABC), e cila menaxhon rrjetin rrugor, raportoi më shumë se 70 bllokime rrugësh në të gjithë vendin.

Protestuesit ankohen se furnizimet me karburant në stacione janë të parregullta dhe cilësia e asaj që është në dispozicion është shpesh shumë e dobët – një fakt që ka shkaktuar dëme në mijëra automjete në muajt e fundit, siç pranojnë autoritetet.

Greva u shpall për shkak të “dështimit të të gjitha marrëveshjeve të arritura” midis përfaqësuesve të sektorit dhe qeverisë, tha Lucio Gomez, që përfaqëson Konfederatën e Shoferëve Bolivianë, gjatë një konference për shtyp.

Presidenti Rodrigo Paz mori detyrën në nëntor 2025, duke premtuar në veçanti të normalizonte furnizimin me karburant të vendit dhe t’i jepte fund radhëve të pafundme në stacionet e benzinës.

Politika e subvencioneve të çmimeve të karburantit, e zbatuar për gati dy dekada nga qeveritë e mëparshme socialiste, pothuajse i shteroi rezervat e dollarëve të përdorura për importet e karburantit dhe e zhyti vendin e Andeve në një krizë të rëndë ekonomike.

Rodrigo Paz i anuloi subvencionet në dhjetor, por kjo dhe masa të tjera që ai ndërmori nuk sollën stabilitet në situatë.

Sipas z. Gomes, “radhët janë rishfaqur” dhe cilësia e dobët e karburantit të disponueshëm në stacionet e benzinës vazhdon të ndikojë në sektor, ndërsa autoritetet nuk i kanë kompensuar plotësisht pronarët e automjeteve për dëmet që kanë pësuar për shkak të fenomenit.