Festë madhështore në Milano për Interin që mbylli sezonin mes emocionesh, trofesh dhe festimesh të jashtëzakonshme me tifozët zikaltër. Pas fitimit të kampionatit dhe të Coppa Italia, atmosfera në “San Siro” ishte më shumë festive sesa konkurruese.

Në fushë, Interi luajti pa presion, duke menduar më shumë për spektaklin dhe përshëndetjet emocionale ndaj lojtarëve që pritet të largohen nga skuadra. Kapiteni Lautaro Martínez u vu në shërbim të ekipit, ndërsa zikaltërit krijuan raste të shumta për t’i dhuruar golin Bonny-t, i cili prej javësh nuk kishte gjetur rrugën e rrjetës.

Goli i avantazhit erdhi në fillim të pjesës së dytë pas një goditjeje këndi të Sucic dhe një devijimi të Bonny-t, edhe pse realizimi u regjistrua si autogol i Edmundsson. Ndërkohë, Hellas Verona luftoi deri në fund dhe arriti të gjejë golin e barazimit me Bowie në minutat e fundit.

Më shumë se rezultati, vëmendja ishte te emocionet. San Siro rezervoi ovacione për Matteo Darmian dhe për kapitenin Lautaro Martinez, ndërsa trajneri Cristian Chivu aktivizoi edhe portierin e tretë Di Gennaro mes entuziazmit të skuadrës dhe tifozëve.

Pas ndeshjes nisi festa e madhe zikaltër në rrugët e Milanos. Autobusi i hapur i Interit përshkoi qytetin mes tymueseve, këngëve dhe fishekzjarreve, deri në Piazza del Duomo, ku mijëra tifozë pritën kampionët e Italisë për një natë të paharrueshme festimesh.