Kryeministri izraelit Benjamin Netanyahu tha se eliminimi i kërcënimit të drejtpërdrejtë bërthamor nga Irani është një arritje e rëndësishme e operacionit ushtarak nga Uashingtoni dhe Tel Avivi, por lufta nuk ka mbaruar ende.

“Ne kryem operacionin më të madh ofensiv në historinë e Izraelit. Ne goditëm shkencëtarë bërthamorë, eliminuam udhëheqës iranianë…, shkatërruam objekte bërthamore, shkatërruam raketa dhe shumicën dërrmuese të impianteve të tyre të prodhimit. Ne shkaktuam dëme të mëdha në ekonominë iraniane – disa e vlerësojnë atë në qindra miliarda dollarë, disa madje një trilion dollarë”, tha ai.

Duke komentuar pakënaqësinë midis popullsisë dhe politikanëve izraelitë në lidhje me përfundimin e luftës kundër Iranit, Netanyahu deklaroi edhe një herë se parandalimi i Iranit nga pajisja me armë bërthamore është misioni i tij i përjetshëm.

“Me apo pa një marrëveshje, Irani nuk do të ketë armë bërthamore sot ose nesër. Për sa kohë që unë jam kryeministër i Izraelit, kjo nuk do të ndodhë”, theksoi ai.

Netanyahu përsëriti pretendimin e tij se kërcënimi bërthamor nga Irani përbënte një kërcënim të drejtpërdrejtë dhe se Izraeli, së bashku me Shtetet e Bashkuara, mund ta eliminonte atë: “Ne e eliminuam kërcënimin e shkatërrimit të popullsisë izraelite për shumë vite. Ne e bëmë. Ne e shpëtuam Izraelin nga shkatërrimi.”

Megjithatë, ai shtoi se lufta nuk ka mbaruar ende: “Ne duhet të vazhdojmë të jemi vigjilentë, të ruajmë forcën tonë, vendosmërinë tonë dhe të mbrohemi për aq kohë sa të jetë e nevojshme. Kjo nuk ka të bëjë vetëm me Iranin.”

Netanyahu tha se Izraeli do të vazhdojë të luftojë forcat pro-iraniane në rajon, duke përfshirë grupet në Gaza, Liban, Siri, Jemen dhe Bregun Perëndimor. Ai shtoi se ushtria izraelite do të ruajë një prani në zonat e sigurisë të krijuara në Gaza, Liban dhe Siri.