Vala e thirrjeve të drejtpërdrejta ndaj organit të akuzës ka vijuar në bulevardin “Dëshmorët e Kombit” përpara godinës së Kryeministrisë. Protestuesi Elidon Lika ka marrë mikrofonin duke kërkuar nga autoritetet e drejtësisë që të përshpejtojnë veprimet e tyre hetimore ndaj kreut të qeverisë shqiptare.

Lika bëri një krahasim me reagimin e autoriteteve ndërkombëtare, duke vënë në dukje se zyrtarë të lartë të huaj po përballen me llogaridhënien, ndërsa në Shqipëri ende nuk po veprohet me të njëjtën shpejtësi.

“Autoritetet shqiptare të nxitojnë me hetimin. Është thirrur ministri i Financave të Holandës, por akoma nuk është thirrur Rama,” u shpreh ai përpara turmës.

Në mbyllje të fjalës së tij, ai përcolli një kërkesë të prerë dhe të qartë në emër të qytetarëve që ndodhen në shesh drejtuar SPAK.

“Nga ky shesh përsëri i bëjmë thirrje SPAK-ut: hetoni Ramën!” përfundoi Elidon Lika mes miratimit të protestuesve.