Në ditën e 29-të të protestës, publicisti Ndriçim Kulla iu bashkua qytetarëve në shesh, duke e cilësuar tubimin si një “revolucion” që, sipas tij, ka rikthyer shpresën dhe optimizmin në vend.
Gjatë fjalës së tij, Kulla tha se protesta duhet të vazhdojë deri në largimin e kryeministrit Edi Rama nga pushteti. Ai u bëri thirrje qytetarëve të mos e braktisin sheshin, ndërsa kërkoi që edhe politika të reflektojë mbi situatën.
“Kjo protestë na ka dhënë shpresë të gjithëve. Na ka ushqyer me optimizëm, e quaj revolucion. U bëj thirrje politikanëve të meditojnë mbi këtë revolucion dhe të nxjerrin mësime nga tragjeditë që na kanë krijuar”, u shpreh ai.
Publicisti prezantoi gjithashtu librin e tij “Tirania e buzëqeshjes”, ku analizon figurën e kryeministrit Edi Rama, duke e cilësuar atë si një lider që, sipas tij, ka ardhur në pushtet përmes spektaklit dhe jo përmes ndërtimit të institucioneve.
Kulla u bëri apel protestuesve të vijojnë qëndresën në shesh. “Këtë protestë nuk do ta lëshoni derisa të rrëzohet Edi Rama. Përpara!”, deklaroi ai.
Pjesë nga fjala e publicistit Ndriçim Kulla;
“Jam këtu jo vetëm si qytetar. Edhe si një intelektual. Dëshiroj që zemërimin tuaj ta përziejmë edhe pak me kulturë se shikoj një defekt të madh. Kultura të ndriçon mendjen. Nëse do ishim të kulturuar nuk do kishim arritur një ngërç të tillë. Edi Ramën kroatët nuk do e kishim mbajt as 2 vjet. Ne po e mbajmë 16 vjet. Kam bërë një libër kush jemi shqiptarët. Në këto momente kam qenë i dëshpëruar mendoja të rishkruaja librin. Kjo protestë na ka dhënë shpresë të gjithëve. Na ka ushqyer me optimizëm, e quaj revolucion. Pa shtuar asgjë. Si parathënie ju bëj thirrje politikanëve të meditojnë mbi këtë revolucion. Ti vënë gishtin kokës dhe të nxjerrin mësime nga tragjeditë që na kanë krijuar.
Kam ardhur me një dhuratë. Kam medituar gjatë mbi qeverisjen e Ramës dhe kam bërë një libër e quaj diktator, me arsyetim, literaturë me psiqitri, me psikologji me shkencë me një fjalë. Që ky është një nga prurjet më shkatërruese që i ka ardhur kombit shqiptar. Ai është spektakolar, e kam quajtur Djalli, Makbethi që jeton me pushtetin. Libri im, “Tirania e buzëqeshjes”.
Diktatorët si Edi Rama, tipik nuk kanë ardhur me tanke, dhunë represione kanë ardhur me spektakël buzëqeshje me skena, me premtime me batuta. Por gjithmonë nuk kanë ardhur me ide institucionesh. Kanë ardhur me ide pushteti. Në libër do gjeni një analizë të Edi Ramës. Dua tju bëj thirrje këtë protestë nuk do e lëshoni, derisa të rrëzohet Edi Rama. Përpara!”, tha ai.
