Një aksident i rëndë u regjistrua gjatë një rodeoje në lagjen Bronx të New York-ut, ku një kalorës 25-vjeçar u plagos pasi u hodh nga një dem i tërbuar dhe u shkel nga kafsha para qindra spektatorëve.

Pamjet filmike tregojnë se i riu duket se humbet ndjenjat ndërsa ndodhej ende mbi demin, me gjasë pasi goditi kokën gjatë lëvizjeve të forta të kafshës. Pak çaste më vonë, demi e rrëzoi me forcë në tokë, ndërsa njëra prej këmbëve të kalorësit mbeti e bllokuar në uzengji, duke bërë që ai të zvarritej dhe të shkelej nga kafsha.

Spektatorët shpërthyen në britma, ndërsa organizatorët e aktivitetit hynë menjëherë në arenë për ta larguar demin dhe për t’i ardhur në ndihmë të plagosurit. Pas ndërhyrjes së ekipeve të emergjencës, 25-vjeçari u transportua në spital, ku ndodhet në gjendje të qëndrueshme. Incidenti po hetohet nga autoritetet lokale.