Grupi britanik Massive Attack ka deklaruar se mbeti “i befasuar dhe i zhgënjyer” nga mënyra se si u trajtua nga autoritetet e Singaporit, pasi gjatë një koncerti shprehu solidaritet me Palestinën.
Sipas një postimi të publikuar në Instagram, anëtarët e grupit thanë se pas performancës së 29 korrikut u ndaluan nga policia, u morën në pyetje veçmas, iu kontrolluan dhomat e hotelit dhe përkohësisht iu konfiskuan pasaportat.
Gjatë koncertit, dy anëtarë të grupit ngritën një flamur palestinez dhe, së bashku me publikun, brohoritën “Palestina e lirë”. Pas incidentit, autoritetet e Singaporit vendosën t’u ndalojnë hyrjen në vend për një periudhë të pacaktuar.
Policia e Singaporit bëri të ditur se Robert Del Naja dhe Grant Marshall morën “paralajmërime të ashpra” për shkelje të dyshuara të ligjeve që ndalojnë shfaqjen publike të flamujve të huaj dhe kufizojnë deklaratat politike në aktivitetet publike.
Në reagimin e tyre, Massive Attack thanë se thirrjet “Palestina e lirë” nisën spontanisht nga një pjesë e madhe e audiencës dhe se nuk e kishin imagjinuar që mbajtja lart e flamurit të një shteti të njohur ndërkombëtarisht do të konsiderohej shkelje e ligjit.
Grupi theksoi se mbetet krenar për gjestin e bërë së bashku me fansat në Singapor, duke e cilësuar atë si një shprehje solidariteti me popullin palestinez. Postimi i tyre në Instagram u mbush me mijëra komente mbështetëse, përfshirë nga qytetarë të Singaporit, të cilët folën për kufizimet ndaj lirisë së shprehjes në vend.
Megjithatë, pati edhe zëra që kërkuan respektimin e ligjeve lokale. Krijuesja e përmbajtjes Crystal Lim-Lange, e pranishme në koncert, tha se artistët duhet të respektojnë ligjet e vendeve ku performojnë, edhe pse arti historikisht ka qenë i lidhur ngushtë me debatet politike dhe shoqërore.
Massive Attack njihen prej vitesh për angazhimin e tyre politik, veçanërisht lidhur me luftën në Gaza. Më herët këtë vit, Robert Del Naja u arrestua në Londër gjatë një proteste ku shprehu mbështetje për kauzën palestineze.
Singapori ka mbajtur një linjë të ashpër ndaj deklaratave publike për konfliktin Izrael-Gaza, duke argumentuar se kufizimet janë të nevojshme për të ruajtur harmoninë racore dhe fetare në vend. Autoritetet kanë paralajmëruar vazhdimisht kundër përdorimit publik të simboleve dhe flamujve që lidhen me konfliktin dhe kanë gjobitur më parë persona që organizuan protesta të paautorizuara në mbështetje të Palestinës.
Pavarësisht polemikave, Massive Attack vijojnë turneun e tyre botëror dhe pritet të performojnë javën e ardhshme në Australi, pas përfundimit të koncerteve në Azi.
