Ukraina pret që bisedimet teknike me Rusinë për luftën të nisin në të ardhmen e afërt, por kreu i zyrës së presidentit ukrainas, Kyrylo Budanov, paralajmëron se një marrëveshje përfundimtare nuk pritet të arrihet shpejt.

Duke folur në një intervistë për programin “Moseichuk+” në YouTube, Budanov tha se negociatat e ardhshme do të fokusohen kryesisht te çështjet teknike dhe përgatitjet për hapa të mëtejshëm drejt një zgjidhjeje.

“Unë besoj se të gjithë do t’i shohin negociatat të fillojnë shumë shpejt. Por ato do të kenë të bëjnë kryesisht me çështje teknike dhe përgatitje për diçka të rëndësishme, të cilën shpresoj se do ta arrijmë përfundimisht”, deklaroi ai.

Budanov e cilësoi si jorealiste pritshmërinë që lufta të përfundojë në një periudhë të shkurtër, duke paralajmëruar se konflikti mund të vazhdojë edhe gjatë dimrit.

Bisedimet e mbështetura nga Shtetet e Bashkuara deri tani nuk kanë sjellë rezultate konkrete për përfundimin e luftës. Raundi i fundit i negociatave trepalëshe u zhvillua në shkurt.

Kremlini ka shmangur komentet mbi pritshmëritë e Ukrainës për një raund të ri bisedimesh në shtator, me pjesëmarrjen e Shteteve të Bashkuara.

Këshilltari i politikës së jashtme të Kremlinit, Yuri Ushakov, tha se kishte parë raportimet për një takim të mundshëm, por nuk dha detaje konkrete.

Sipas deklarimeve nga pala ukrainase, përfaqësuesit e Ukrainës, Rusisë dhe SHBA-së mund të zhvillojnë një takim muajin e ardhshëm, por deri tani Moska nuk ka konfirmuar zyrtarisht një takim të tillë.