Një vendim i rrallë i drejtësisë greke ka rikthyer në vëmendje një histori të pazakontë ngacmimi në rrjetet sociale, ku një grua 38-vjeçare nga Patra u dënua me burg për krijimin e 203 profileve të rreme, të përdorura për të dëmtuar imazhin e një piloti të Forcave Ajrore nga Volosi, me të cilin kishte pasur një lidhje të shkurtër.
Gjykata e Apelit me Tre Anëtarë për Kundërvajtje e Larisës e shpalli sërish fajtore 38-vjeçaren, duke lënë në fuqi dënimin prej 48 muajsh burg të dhënë në vitin 2024 nga gjykata e Volosit. Ajo ishte dënuar për shkelje të të dhënave personale dhe shpifje përmes internetit. Sipas vendimit, gjykata e apelit nuk e uli dënimin dhe nuk pranoi faktorët lehtësues të kërkuar nga mbrojtja. Gjithashtu, nuk iu dha mundësia që dënimi të konvertohej në gjobë. Nga dënimi i përgjithshëm, gjykata urdhëroi që ajo të vuajë 12 muaj burg, një masë e cilësuar si e pazakontë për vepra të kësaj natyre. 38-vjeçarja nuk ishte e pranishme në seancë dhe tashmë po kërkohet për ekzekutimin e vendimit.
Historia nisi në vitin 2018
Gjithçka nisi në shtator të vitit 2018, kur gruaja dhe piloti u njohën përmes Instagram-it. Në atë kohë, 38-vjeçarja jetonte në Patra, ndërsa 37-vjeçari në Volos. Ajo udhëtoi drejt Volosit për ta takuar dhe qëndroi atje për rreth dy javë. Situata ndryshoi kur piloti u largua për disa ditë për arsye pune. Gjatë kësaj kohe, ai e kishte fikur telefonin për disa orë. Kur e ndezi sërish, gjeti rreth 180 telefonata dhe 50 mesazhe nga 38-vjeçarja. Pas kthimit në Volos, ai i kërkoi që t’i jepnin fund lidhjes, por sipas materialit gjyqësor, gruaja nuk e pranoi ndarjen.
Pas bllokimit të saj në rrjetet sociale dhe refuzimit të përgjigjes ndaj telefonatave, ajo dyshohet se nisi të kontaktonte miqtë dhe familjarët e tij. Sipas akuzave, 38-vjeçarja krijoi profile të shumta të rreme duke përdorur emrin e plotë dhe fotografitë e pilotit. Në këto llogari publikoheshin informacione personale, si dhe pretendime dhe përmbajtje fyese që synonin të dëmtonin reputacionin e tij. Profilet e rreme përdoroheshin gjithashtu për të shtuar si kontakte miq, kolegë dhe persona të njohur të pilotit, të cilëve u dërgoheshin mesazhe dhe komente abuzive në emër të tij. Në total, sipas çështjes gjyqësore, u identifikuan 203 profile të rreme.
Pas nisjes së kësaj historie, piloti është përballur me një proces të gjatë ligjor, duke kërkuar mbrojtje përmes urdhrave të ndalimit dhe padive. Sipas materialit, ai ka fituar çështjet e mëparshme dhe tashmë ka marrë edhe një vendim në favor të tij nga Gjykata e Apelit e Larisës. Vendimi i fundit pritet të shënojë një tjetër etapë në një histori që, sipas palës së dëmtuar, ka zgjatur prej vitesh.
