Policia e Fierit ka finalizuar operacionin e koduar “No Games”, duke goditur një rast të organizimit të paligjshëm të lojërave të fatit në një lokal në lagjen “Kastriot”.

Gjatë ndërhyrjes, efektivët zbuluan një ambient të përshtatur posaçërisht për zhvillimin e lojërave të fatit, ku u kapën në flagrancë 16 persona duke luajtur.

Në pranga ranë administratorja e lokalit, 49-vjeçarja Dh. Sh., banuese në Fier, dhe 43-vjeçari R. C., banues në Tiranë, i dyshuar si organizatori i lojërave të fatit.

Ndërkohë, 16 personat e kapur duke luajtur u proceduan në gjendje të lirë.

Gjatë operacionit, policia sekuestroi në cilësinë e provës materiale një tavolinë pokeri, një kuti me 500 çipsa, 6 pako me letra bixhozi, 5 telefona celularë dhe 8 mijë euro.

Materialet procedurale i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Fier për veprime të mëtejshme.