Avionë të lehtë sulmi dhe automjete ushtarake janë parë në një qendër të re të përbashkët stërvitjeje Kinë-Laos, e cila ndodhet ende në ndërtim. Imazhet satelitore të shqyrtuara nga Reuters tregojnë se aktiviteti në objekt është rritur ndjeshëm që prej njoftimit zyrtar për krijimin e tij. Fotot, të siguruara më 30 shtator nga kompania komerciale satelitore Vantor, tregojnë tetë avionë të tipit K-8 dhe më shumë se dy duzina automjetesh mbështetëse në një pistë ende në proces ndërtimi.

Objekti ndodhet në Ban Khun, në periferi të kryeqytetit të Laosit, Vientiane. Imazhet tregojnë gjithashtu punime të konsiderueshme ndërtimore rreth pistës, vetëm një ditë pasi Ministria kineze e Mbrojtjes njoftoi ngritjen e qendrës së përbashkët të stërvitjes. Zhvillimi i shpejtë i objektit ka tërhequr vëmendjen e atasheve ushtarakë dhe ekspertëve të sigurisë në rajon. Disa analistë vlerësojnë se, nëse objekti shndërrohet në një strukturë të përhershme me funksione të gjera ushtarake, ai mund të përfaqësojë një zgjerim të rëndësishëm të pranisë së Kinës në Azinë Juglindore. Kina ka modernizuar me ritme të shpejta forcat e saj të armatosura gjatë dy dekadave të fundit, por jashtë territorit të saj ka një numër relativisht të kufizuar të objekteve ushtarake. Përveç bazës në Xhibuti, Pekini ka zgjeruar gjithashtu qasjen ushtarake dhe logjistike në rajon, përfshirë portin Ream në Kamboxhia.

Sipas analistëve, Laosi ka rëndësi strategjike për Kinën për shkak të kufirit të përbashkët mes dy vendeve dhe lidhjeve infrastrukturore, përfshirë hekurudhën që lidh territorin e Laosit me Kinën. Megjithatë, ekspertë të tjerë janë më të rezervuar në vlerësimin e rolit të objektit. Rachel Vandenbrink, analiste e lartë në Institutin Australian për Politikat Strategjike, tha se zgjedhja e këtij lokacioni mund të lidhet më shumë me mundësinë për të shfrytëzuar një infrastrukturë të gatshme sesa me një nevojë të përcaktuar qartë operacionale.

Analistët e sigurisë Colin Koch dhe Alexander Neil, së bashku me ekspertë të Vantor, kanë identifikuar në imazhet satelitore avionë që duken të jenë të tipit Hongdu JL-8, të njohur edhe si K-8. Ky avion me dy vende përdoret kryesisht për stërvitje, por ka edhe kapacitete për sulme të lehta. Ai është zhvilluar bashkërisht nga Kina dhe Pakistani dhe është eksportuar në disa vende. Laosi aktualisht disponon katër avionë të këtij lloji, sipas vlerësimeve të Institutit Ndërkombëtar për Studime Strategjike me bazë në Londër. Ndërsa punimet në bazë vazhdojnë, ekspertët po monitorojnë nëse aty do të ndërtohen edhe sisteme të mbrojtjes ajrore, depo municionesh dhe karburanti apo pajisje për mbikëqyrje. Prania e këtyre elementeve do të mund të tregonte se objekti ka një funksion më të gjerë sesa thjesht stërvitjet e përbashkëta.

Alexander Neil tha se, megjithëse aeroporti aktualisht duket relativisht i vogël, infrastruktura mund të zgjerohet në të ardhmen për të pritur avionë më të mëdhenj, përfshirë mjete të inteligjencës së sinjaleve dhe avionë të mbikëqyrjes elektronike. Zhvillimi i kësaj qendre po ndiqet me vëmendje nga vendet e rajonit, ndërsa ende nuk është e qartë se çfarë përmasash dhe funksionesh ushtarake do të ketë objekti kur të përfundojë ndërtimi.

© BalkanWeb
Për t’u bërë pjesë e grupit "Balkanweb" mjafton të klikoni: Join Group dhe kërkesa do t’ju aprovohet menjëherë. Grupi Balkanweb
Etiketa: