Studentët vijojnë protestën para Ministrisë së Arsimit në Tiranë, ndërsa kryeministri Edi Rama ka mbërritur në godinën e Kryeministrisë. Siç u pa dhe nga pamjet live të transmetuara live nga News24, Rama doli nga makina dhe më pas hyri në zyrën e tij. Sot ai kishte planifikuar dhe të mbante një takim me mbledhjen e zgjeruar të grupit, por e anuloi pas protestave të rinisë.

Protesta studentore ka përfshirë disa fakultete të kryeqytetit, me të rinjtë që kanë bojkotuar mësimin për t’iu bashkuar tubimit. Gjatë marshimit, studentët u kanë bërë thirrje edhe qytetarëve dhe kalimtarëve që t’u bashkohen protestës.

Me thirrjet “Bashkohuni me ne!” dhe “Rama, jep dorëheqjen!”, studentët kanë kërkuar mbështetje për kauzën e tyre. Ndërkohë, situata para Ministrisë së Arsimit është tensionuar, ku protestuesit kanë shkulur kangjella metalike dhe kanë hedhur gurë e sende të forta në drejtim të godinës dhe policisë.

Protesta vijon, ndërsa mbetet për t’u parë nëse do të ketë një reagim nga qeveria lidhur me kërkesat e studentëve, të cilët kërkojnë dorëheqjen e Ramës.