Ish-ministrja e Jashtme, Elisa Spiropali, ka reaguar pas zgjedhjeve në Serbi, duke e cilësuar rezultatin si një mesazh të fortë për fuqinë e qytetarëve për të ndryshuar pushtetin përmes votës. Në një kohë kur Shqipëria po përballet prej dy javësh me protesta studentore që kërkojnë dorëheqjen e kryeministrit Edi Rama, deklarata e Spiropalit merr një vëmendje të veçantë edhe në debatin politik vendas. Ajo thekson se asnjë pushtet nuk mund ta konsiderojë veten të përhershëm dhe se qytetarët kanë mundësinë të përcaktojnë drejtimin e vendit të tyre. Sipas ish-ministres socialiste, rezultati i zgjedhjeve në Serbi mund të shënojë fundin e epokës së dominimit politik të Aleksandar Vuçiçit. Spiropali shpreh gjithashtu shpresën se ndryshimi politik në Beograd do të sjellë një qasje të re ndaj Kosovës dhe marrëdhënieve rajonale.
Në reagimin e saj, Spiropali nënvizon se vota e qytetarëve serbë dëshmoi se edhe pushtetet që duken të palëkundura mund të ndryshohen. Ish-ministrja e Jashtme shpreh urimin që zhvillimet në Serbi të shënojnë një kapitull të ri për demokracinë dhe bashkëpunimin mes vendeve të Ballkanit.
Spiropali ndalet veçanërisht te marrëdhëniet Kosovë–Serbi, duke theksuar se drejtuesit e rinj në Beograd duhet të dëshmojnë përmes veprimeve konkrete gatishmërinë për dialog dhe respektimin e sovranitetit të Kosovës. Një mesazh ajo ka edhe për përfaqësuesit shqiptarë të Luginës së Preshevës, duke shprehur pritshmërinë që përfaqësimi i tyre parlamentar të sjellë më shumë të drejta, barazi dhe mundësi për shqiptarët që jetojnë në Serbi. Spiropali thekson se Shqipëria ka interes për një Serbi demokratike dhe europiane, ndërsa kërkon që ndryshimi politik të shoqërohet me hapa konkretë drejt paqes dhe stabilitetit rajonal.
REAGIMI I SPIROPALIT
Serbët shprehën masivisht me votë vullnetin e tyre për ndryshim, duke mbyllur kështu, ndoshta përgjithmonë, epokën e dominimit politik të Aleksandër Vuçiç.
Zgjedhjet në Serbi na kujtojnë atë që gjithmonë e kemi ditur: se popujt e kanë mundësinë dhe fuqinë ta ndryshojnë drejtimin e vendit të tyre, edhe përballë pushteteve që pretendojnë të jenë të përhershme.
Uroj që kjo zgjedhje të hapë një kapitull të ri për demokracinë në Serbi dhe bashkëpunimin në rajon.
Çka ndodhi në Serbi hap për Ballkanin një mundësi që duhet gjykuar hap pas hapi nga veprimet dhe reagimet që do të pasojnë. Siç theksoi kancelari Merz, ngecja në normalizimin e marrëdhënieve Kosovë–Serbi pengon përparimin e rajonit. Drejtuesit e rinj kanë rastin dhe mundësinë të dëshmojnë se ndryshimi përfshin edhe eleminimin e mendësisë shoviniste, gatishmërinë për dialog, zbatim të marrëveshjeve, dhe respekt për sovranitetin e Kosovës.
Një urim i veçantë për përfaqësuesit shqiptarë të Luginës së Preshevës, me pritshmërinë që zëri i tyre parlamentar të përkthehet në sa më tepër barazi, të drejta dhe mundësi për shqiptarët në Serbi.
Shqipëria është e interesuar për një Serbi demokratike dhe europiane. Prova e këtij orientimi do të jetë mënyra si pushteti i ri u përgjigjet qytetarëve të vet dhe ndërton marrëdhëniet me fqinjët. Me mbështetjen e BE-së dhe SHBA-së, kjo mundësi duhet kthyer në hapa konkretë drejt paqes së qëndrueshme që u detyrohemi qytetarëve dhe brezit të ri të Ballkanit.
