Presidenti amerikan Donald Trump ka mbrojtur vendimin e administratës së tij për të vazhduar operacionet ushtarake kundër Iranit, duke deklaruar se ishte Teherani ai që nisi konfliktin me Shtetet e Bashkuara. Kreu i Shtëpisë së Bardhë e cilësoi armëpushimin e mëparshëm si një “humbje kohe”, duke argumentuar se ndërhyrja ushtarake ishte e nevojshme për sigurinë kombëtare amerikane.

Gjatë një tubimi elektoral të zhvilluar të hënën në Corinth të Misisipit, në kuadër të fushatës për zgjedhjet e mesmandatit të 3 nëntorit, Trump mbështeti deklaratën e një kongresmeni republikan, sipas të cilit Shtetet e Bashkuara nuk ishin përgjegjëse për nisjen e luftës.

“Ne nuk e filluam luftën me Iranin. Irani e filloi luftën me ne”, deklaroi presidenti amerikan, duke mbrojtur qëndrimin e administratës së tij ndaj Teheranit.

Trump iu përgjigj gjithashtu kritikave për pasojat ekonomike të konfliktit, veçanërisht për rritjen e çmimeve të naftës dhe karburanteve, një nga çështjet që kanë dominuar debatin politik amerikan përpara zgjedhjeve.

Presidenti pranoi se kishte qenë i vetëdijshëm për mundësinë e një rritjeje të konsiderueshme të çmimeve, por këmbënguli se kjo nuk mund të pengonte vendimet e administratës së tij në fushën e sigurisë.

“Isha absolutisht i përgatitur ta bëja, sepse realisht nuk kishim zgjidhje tjetër. Duhej të ishte bërë shumë kohë më parë”, u shpreh Trump.

Kreu i Shtëpisë së Bardhë u ndal edhe te marrëveshja e mëparshme e armëpushimit me Iranin, duke shprehur hapur pakënaqësinë e tij për mënyrën se si ishte zhvilluar procesi diplomatik.

“Ne patëm një armëpushim të vogël, i cili nuk më pëlqeu kurrë. Ne duam të jemi mirë, por, sipas mendimit tim, ishte thjesht humbje kohe”, deklaroi ai.

Trump ka shprehur edhe më herët mosbesim ndaj negociatave me Teheranin. Në korrik, presidenti amerikan kishte deklaruar se e konsideronte armëpushimin të përfunduar dhe se vazhdimi i bisedimeve me Iranin nuk po sillte rezultate konkrete.

Gjatë fjalimit, presidenti amerikan ngriti gjithashtu shqetësimin për programin raketor iranian, duke paralajmëruar se Teherani kishte zhvilluar kapacitete ushtarake që mund të kërcënonin jo vetëm vendet evropiane, por në të ardhmen edhe territorin e Shteteve të Bashkuara.

Sipas Trump, raketat iraniane mund të përbënin rrezik për qytete të mëdha amerikane, përfshirë San Diegon dhe Los Angelesin.

“Ata do të godisnin San Diegon, do të godisnin Los Angelesin, do të godisnin qytetet tona”, tha presidenti amerikan.