Një zjarr në Laboratorin Kombëtar të Lumit Savannah, në Karolinën e Jugut, SHBA, shkaktoi një rrjedhje të materialit radioaktiv dhe aktivizoi protokollet e emergjencës në objektin bërthamor. Autoritetet shpallën të mërkurën gjendje të jashtëzakonshme të nivelit të dytë më të lartë, ndërsa vendosën kufizime në lëvizjen në zonën përreth. Sipas zyrtarëve, incidenti u regjistrua në një dhomë të laboratorit. Stacionit lokal televiziv WRDW iu konfirmua se kishte ndodhur një “rrjedhje radiologjike e pafiltruar në nivelin e tokës”. Megjithatë, autoritetet theksuan se nuk ishte zbuluar ndotje radioaktive jashtë objektit të prekur dhe se nuk kishte shenja të ndikimeve përtej kufijve të tij.
Zjarri u shua më vonë, ndërsa gjendja e jashtëzakonshme u hoq të mërkurën në mbrëmje. Deri tani, nuk janë bërë të ditura shkaqet e zjarrit, lloji dhe sasia e materialit të çliruar, apo nëse ka persona të lënduar. Sipas njoftimit zyrtar të kompleksit Savannah River Site, alarmi u shpall rreth orës 17:39, ndërsa hyrjet e objektit u mbyllën për automjetet që hynin. Për arsye sigurie, u kufizuan përkohësisht edhe lëvizjet hekurudhore, lumore dhe ajrore në zonën përreth. Disa punonjës u udhëzuan të qëndronin në vende të sigurta gjatë ndërhyrjes së ekipeve të emergjencës. Sipas agjencisë Reuters, një punonjës pësoi lëndime të lehta dhe u dërgua në spital. Autoritetet nuk kanë bërë të ditur shkakun e zjarrit apo sasinë e materialit radioaktiv të çliruar.
Per a post on Facebook from the SRS, there was a fire at the Savannah River National Lab, within the Savannah River Site, earlier this evening resulting in the declaration of a Site Area Emergency at 5:39pm local time. The fire was extinguished and no contamination is reported outside the affected facility. All entrances to the SRS have been secured and air traffic in the vicinity is being restricted.
The Savannah River National Lab is the research portion of the site and conducts a variety of radioactive related research.
— TheIntelFrog (@TheIntelFrog) October 29, 2026
Emergjenca u shpall e përfunduar në orën 21:45, pasi zjarri u shua dhe kontrollet radiologjike nuk zbuluan nivele të matshme ndotjeje. Autoritetet hoqën masat mbrojtëse dhe rihapën hyrjet e kompleksit. Laboratori Kombëtar i Lumit Savannah ndodhet brenda kompleksit Savannah River Site, një zonë me sipërfaqe rreth 803 kilometra katrorë, e krijuar në vitet 1950 gjatë Luftës së Ftohtë për prodhimin e materialeve që përdoreshin në armët bërthamore. Sot, aktivitetet e kompleksit përfshijnë kërkimin shkencor, menaxhimin e materialeve bërthamore dhe trajtimin e mbetjeve radioaktive.
