Qysh nga 2009-ta, kur Rama filloi të garojë për postin e kryeministrit, për PS-në e tij dhe partitë satelite rreth saj (PSD, PDS, PSV-91, etj. etj.) kanë votuar të paktën 800 mijë zgjedhës. Më 2013, koalicionit të tij iu shtuan edhe194 mijë votuesit e LSI-së dhe PBDNJ-së, por më pas ato parti u larguan nga koalicioni.
Edhe në zgjedhjet e fundit lokale, rreth 800 mijë zgjedhës votuan për kryebashkiakët e përzgjedhur nga Rama (shihni tabelën e mëposhtme). Sidoqoftë, këta të fundit patën mbështetje në disa bashki nga PSD-ja, e cila duket se është ftohur me Ramën kohët e fundit.
| Për çfarë kryebashkiakësh votuan banorët e rritur më 14 maj 2023 | ||
| Për kryebashkiakë | % | Votuesit e 14 majit |
| Socialistë | 39.2% | 800,000 |
| Opozitarë | 29.4% | 600,000 |
| Nuk votuan fare | 31.4% | 640,000 |
Dhe pyetja për Ramën (dhe për ne që merremi me shifrat elektorale) është nëse PS-ja do ta kapë e vetme kuotën e 800 mijë votave në zgjedhjet e ardhshme.
Nga sondazhet mujore që kam zhvilluar prej shtatorit e këtej për Report TV, duket se PS-ja është e ankoruar rrotull shifrës së 750 mijë votave, pavarësisht se Rama si politikan ka më shumë se 800 mijë simpatizantë (shihni dy grafikët e mëposhtëm). Kjo diferencë mes votuesve potencialë të PS-së dhe simpatizantëve të tij personalë duket se e ka nxitur Ramën ta mobilizojë partinë një vit para zgjedhjeve, duke u kërkuar publikisht dje vartësve që PS-ja të dalë fituese në secilën nga 5200 qendrat e votimit.
