James Bond, agjenti legjendar 007, nuk u krijua vetëm nga imagjinata e shkrimtarit Ian Fleming. Përvojat e tij në Departamentin e Inteligjencës së Marinës Mbretërore gjatë Luftës së Dytë Botërore dhe njohjet me agjentë sekretë u bënë frymëzim për personazhet e librave të tij.
Mes 10 figurave që përmenden si frymëzim për universin e Bond janë spiuni britanik me origjinë ruse Sidney Reilly, agjenti i dyfishtë Dusko Popov, oficeri i inteligjencës Wilfred Dunderdale dhe agjentja e SOE-së Christine Granville.
Ndërsa disa prej tyre dyshohet se kanë ndikuar në krijimin e vetë James Bond, të tjerë lidhen me personazhe si Vesper Lynd, shefi M dhe specialisti i pajisjeve Q.
Një nga emrat më të njohur është Dusko Popov, agjent i dyfishtë gjatë Luftës së Dytë Botërore, i cili thuhet se është takuar me Flemingun në një kazino në Portugali. Loja e bixhozit në romanin e parë, Casino Royale, është një nga arsyet pse kjo lidhje është përmendur shpesh.
Ndërkohë, Maxwell Knight konsiderohet nga biografë si një prej modeleve të mundshme për personazhin M, ndërsa Charles Fraser-Smith, i cili prodhonte pajisje të fshehta për agjentët britanikë, lidhet me krijimin e personazhit Q.
Në listë përfshihen edhe Fitzroy Maclean, Betty Pack, William Stevenson dhe John Godfrey, ky i fundit drejtori i inteligjencës detare, me të cilin Fleming kishte punuar drejtpërdrejt.
Megjithatë, jo të gjitha këto lidhje janë konfirmuar nga shkrimtari. Vetë Fleming kishte deklaruar se James Bond ishte një përzierje e agjentëve sekretë dhe komandove që kishte njohur gjatë luftës.
Romani i parë, Casino Royale, u botua në vitin 1953 dhe shënoi fillimin e një prej sagave më të famshme të spiunazhit në historinë e letërsisë dhe kinematografisë.
