Terror në mes të klientëve të McDonald’s në Angli nga një aktivist i cili vendosi të shprehte solidaritetin e tij me popullin palestinez duke lëshuar dhjetëra minj në një restorant në Birmingham.
Brejtësit ishin lyer me ngjyrat e flamurit palestinez, raporton Daily Mail dhe u sollën në restorant nga burri, identiteti i të cilit mbetet i panjohur.
Videot që qarkullojnë në rrjetet sociale tregojnë një burrë që drejton makinën e tij (me fjalën “PAIISTN” në targën e saj) për në restorant dje pasdite, duke hapur më pas bagazhin dhe duke nxjerrë një kuti të madhe.
Aktivisti – i veshur me një flamur palestinez në kokë – më pas hyn në restorant dhe hedh kutinë me minj në dysheme, drejt dy grave që ikin nga frika.
Burri dëgjohet duke bërtitur parulla pro “Palestinës së lirë” ndërsa kthehej në makinën e tij, përpara se të bënte thirrje për bojkot ndaj Izraelit.
Sipas gazetës britanike, zinxhiri i McDonald’s konfirmoi se “një numër minjsh” u lëshuan në restorant, i cili u “dezinfektua plotësisht” pasi u hoqën brejtësit.
Videoja e postuar nga aktivisti në rrjetet sociale tregon mesazhe që u bëjnë thirrje britanikëve të bojkotojnë bizneset që mbështesin “aparteidin Izrael”, ndërsa klipi përfundon me një telefonatë të regjistruar në të cilën dëgjohet një burrë duke u mburrur për pushtimin e restorantit dhe një zë tjetër thërret misioni “i suksesshëm”.
