Bullgaria ka dëbuar kreun e kishës ortodokse ruse në Sofje dhe dy priftërinj bjellorusë me pretendimin se kanë vepruar në interesat gjeopolitike të Moskës, thanë autoritetet e saj të enjten.

Agjencia e Sigurisë Kombëtare e Bullgarisë akuzoi tre klerikët për zbatimin e “strategjisë hibride të Moskës për të ndikuar qëllimisht në proceset gjeopolitike në Bullgari në favor të interesave ruse”.

Ambasada ruse në Sofje tha në një postim në Facebook se një nga personat ishte përfaqësuesi i Kishës Ortodokse Ruse në Sofje, Arkimandrit Vassian.

Bullgaria është një vend sllav dhe ortodoks me lidhje të ngushta historike dhe kulturore me Rusinë. Marrëdhëniet, megjithatë, janë tensionuar që kur Rusia nisi luftën e saj kundër Ukrainës , me Sofjen që dëboi 70 anëtarë të stafit diplomatik rus vitin e kaluar.