Katër kërcënime me bomba ndaj avionëve të pasagjerëve janë raportuar të martën, më 3 nëntor, në disa vende të Evropës, duke vënë në alarm autoritetet e sigurisë dhe duke shkaktuar ndryshime në itineraret e fluturimeve.
Incidentet u regjistruan në Poloni, Spanjë dhe Bullgari, ndërsa avionët e përfshirë ishin nisur nga Londra, Kopenhageni, Mançesteri dhe Izraeli.
Sipas BBC-së, dy prej kërcënimeve kishin të bënin me fluturime drejt kryeqytetit polak, Varshavës.
Në rastin e parë, një avion me 181 pasagjerë, i nisur nga aeroporti Heathrow i Londrës drejt aeroportit Chopin të Varshavës, kreu një ulje emergjente në aeroportin Varshavë-Modlin. Pas uljes, avioni iu nënshtrua kontrolleve nga ekspertët e sigurisë.
Një tjetër avion, i nisur nga Kopenhageni dhe me destinacion gjithashtu Varshavën, u ul normalisht në aeroportin Chopin, pavarësisht kërcënimit të raportuar.
Ndërkohë, në Spanjë, një avion i kompanisë Ryanair, që fluturonte nga Mançesteri, u detyrua të ndryshonte itinerarin dhe të ulej në aeroportin e Murcias.
Francisco Lucas, zëdhënës i qeverisë spanjolle në rajonin e Murcias, bëri me dije se në bordin e avionit ndodheshin 121 persona, përfshirë edhe anëtarët e ekuipazhit.
Incidenti i katërt u regjistrua në Bullgari, ku një avion i nisur nga Izraeli u ul në Sofje pas marrjes së një kërcënimi me bombë përmes email-it. Sipas mediave lokale, kërcënimi rezultoi të ishte një alarm i rremë.
Këto katër incidente vijnë vetëm një ditë pas një tjetër alarmi në aviacionin evropian.
Një avion i kompanisë Wizz Air, i nisur nga aeroporti London Luton drejt Budapestit, u detyrua të kryente një ulje emergjente pas një kërcënimi të ngjashëm me bombë.
Avioni mbërriti në kryeqytetin hungarez nën shoqërimin e një avioni luftarak të Forcave Ajrore të Hungarisë.
Ngjarjet kanë shtuar shqetësimet për sigurinë e transportit ajror në Evropë, ndërsa autoritetet kanë ndërmarrë kontrolle dhe masa shtesë pas kërcënimeve të raportuara.
