Dy pilotë u vranë kur një avion luftarak F-7 u rrëzua pranë provincës Isfahan në Iranin qendror të martën, sipas mediave shtetërore.
Incidenti ndodhi rreth orës 8:10 të mëngjesit me orën lokale (0340 GMT) kur avioni, i cili ishte nisur nga baza ajrore Shahid Babaei në Isfahan, u rrëzua në Anarak, gati 200 kilometra (124 milje) në lindje të qytetit të Isfahanit.
Raportohet se avioni ishte në një mision stërvitor në Anarak, i cili bie në qarkun Nain të provincës Isfahan.
Dy pilotët në bordin e avionit, të identifikuar si major Qassem Zamani dhe toger i parë Mohammad Javad, u vranë të dy në përplasje, konfirmuan zyrtarët.
Agjencitë gjysmë zyrtare të lajmeve ISNA dhe Tasnim cituan zyrtarë ushtarakë të kenë thënë se shkaku i rrëzimit ishte një “defekt teknik” në avionin luftarak.
Mësohet se për ngjarjen janë urdhëruar hetime.
Irani është përballur me cilësinë e dobët të ajrit në javët e fundit, gjë që ka detyruar mbylljen e shkollave, universiteteve dhe zyrave qeveritare në shumë provinca, përfshirë Teheranin dhe Isfahanin.
Ka pasur shumë incidente të tilla në të kaluarën e afërt, më së fundi në shkurt kur një avion F-5 që i përkiste ushtrisë u rrëzua në qytetin veriperëndimor të Tabrizit, duke vrarë dy pilotë dhe një person tjetër.
