Kreu i grupit parlamentar të Partisë Socialiste, Taulant Balla gjatë një takimi me të rinj në Elbasan në kuadër të ‘FRESSH VOICE’, deklaroi se 25 prilli është ditë me rëndësi për shqiptarët.
Teksa u ndal tek situata aktuale që po kalon vendi ynë dhe mbarë bota, pandemia e covid-it, i bëri apel të rinjve që të ruajnë veten dhe të mbajnë maskat.
Mes të tjerash, Balla u shpreh i bindur se PS do të marrë një tjetër mandat të tretë. Po ashtu, socialisti Balla solli në vëmendje dhe protestat që nisën në mbarë vendin nga studentët në dhjetor të 2018-ës, ndërsa ai pranoi hapur se ajo ishte një shuplakë për qeverinë.
“Ajo që duhet të diskutojmë është lufta e ditës, përballja me COVID. Elbasani është qarku i 4 për nga numri i të rasteve. Elbasani është një qytet universitar, ku javën e ardhshme një pjesë e vajzave dhe djemve vjen për studime. Apeli im; ju lutem sa më shumë, mbani maskën, lani duart dhe gjithçka që është e mundur që ta parandalojmë. Dikush ka thënë se; “pse i bëni këto takime?”, them se nëse do të mbaheshin në këto distanca takimet, s’ka problem. 25 prilli është me rëndësi për Shqipërinë, Nuk votohet vetëm për faktin se kush voton për 4 vitet e ardhme, por PS do të marrë një mandat të tretë. Me rëndësi është se si të kuptohet se si do të jetë Shqipëria në 2030-ën. Përpara zgjedhjeve të vitit tjetër do të paraqesim vizionin tonë se si e shohim Shqipërinë në 2030, ku të rinjtë do të kenë prioritet. Të gjithë e mbajnë mend kur në 2018 dhjetor studentët u ngritën. Na dhanë një shuplakë të merituar. Duhet ta kishim kuptuar me kohë atë nevojë që ishte për gjendjen në universitet dhe konvikte. Nëse bëjmë një analizë të qartë dhe objektive në 2013-ën, unë besoj se biem dakord që tashmë për sa i përket Paktit të Universitet jemi në rrugën e duhur. Kjo për shkak të investimeve në universitete dhe ajo akomoduese. I kam ndjekur punimet në konviktin e Elbasani, janë si hotelet me 2 ose 3 yje. Nuk duhet të harrojmë se për pak ditë bëjmë 1 vit, nga tërmeti i 26 nëntorit, na erdhi dhe një valë tjetër e rëndë, një tërmet i padukshëm. Një armik hileqar dhe dëmet njerëzore janë të mëdha. Edhe pse numri i humbjeve është më i ulët. Këtu gjejnë rastin që të falënderoj Gledin për drejtimin e një operacioni humanitar të shkëlqyer në ditët e mbylljes dhe secilin prej jush.”, pohoi Balla.
(BalkanWeb)
