Një vrasës serial gjerman, i cili ishte tashmë në burg për vrasjen e tre fëmijëve, doli në gjyq në Francë të martën për rrëmbimin dhe vrasjen e një djali 10-vjeçar gjatë një ekskursioni shkollor në vitin 2004.
Martin Ney, i dënuar me burgim të përjetshëm në Gjermani për 3 vrasjet, i është “huazuar” gjyqtarit francez për disa muaj.
I quajtur “burri me të zeza”, 56 vjeçari Martin Ney akuzohet nga drejtësia fraceze për rrëmbimin dhe zhdukjen e Jonathan Coulom nga një kamp pushimesh shkollor në Francën perëndimore.
Shtrati i djalit ishte bosh kur shokët e tij të dhomës u zgjuan në një konvikt në kampin bregdetar në Saint-Brevin-les-Pins. Më shumë se një muaj më vonë, trupi i Jonathanit u gjet nën një bllok betoni, në një pellg pranë qytetit të Guerande, rreth 30 kilometra nga vendi ku ai ishte zhdukur. Një litar ishte i lidhur rreth qafës, këmbëve dhe duarve të tij. Në javët e para të kërkimit për djalin e zhdukur në Francë, autoritetet gjermane i informuan hetuesit francezë se rrethanat e zhdukjes së tij ngjanin me ato të disa rrëmbimeve dhe vrasjeve të fëmijëve që i atribuohen një të dyshuari me nofkën “burri me të zeza”.
Ney, i cili mbante maska gjatë sulmeve të tij, ishte dënuar me burgim të përjetshëm në vitin 2013 pasi rrëfeu vrasjen e tre djemve të moshës 13, 8 dhe 9 vjeç midis viteve 1992 dhe 2001.
Martin Ney u dënua për rrëmbimin, abuzimin dhe vrasjen e Stefan Jahr (13 vjeç) nga një shkollë me konvikt në vitin 1992. Në vitin 1995, ai vrau Dennis Rostel (8 vjeç) dhe në vitin 2001 Dennis Klein (9 vjeç), kur ky i fundit rezistoi të rrëmbehej nga një kamp shkollor në Bremerhaven. Ney gjithashtu abuzoi seksualisht me fëmijë të tjerë.
Ney u arrestua në vitin 2011. Edhe pse rrëfeu vrasjen e tre djemve, ai mohoi rrëmbimin e djalit në Francë, duke pretenduar se nuk kishte qenë në vend në atë kohë.
Hetimi mori një kthesë të re në vitin 2017, kur një ish-shoku i qelisë pretendoi se e kishte dëgjuar Neyn të bënte një rrëfim. Dyshohet se Ney i pranoi atij se kishte vrarë një fëmijë në Francë, duke shprehur habi që nuk ishte identifikuar nga një burrë që kishte takuar në atë kohë.
Gjykimi që pritet të zgjasë deri më 5 qershor, përfaqëson fundin e mundshëm të një “udhëtimi shumë të gjatë ligjor”, tha për agjencinë e lajmeve AFP Caty Richard, një avokate që përfaqëson gjyshen e djalit. Ajo tha se familja shpresonte që Ney “më në fund do të merrte përgjegjësi dhe do të jepte shpjegime”.
Për shumë gjermanë, emri Martin Ney (në foto) sjell në mendje një burrë me trup të stërmadh, veshur me një xhaketë të trashë lëkure të mbërthyer deri në jakë, të zezë si pantallonat e tij, doreza dhe një balaklavë që i fshihte fytyrën. Ky burrë i gjatë dhe atletik bënte një jetë në dukje të zakonshme. Por, pasi u fsheh nën veshjen e tij të errët, ai u bë një grabitqar i frikshëm, duke gjuajtur djem të rinj.
I lindur më 12 dhjetor 1970, në Bremen, në veri të vendit, Martin Ney, një ish-ushtar dhe shofer kamioni i shndërruar në punonjës kujdesi për fëmijë, konsiderohet si një nga kriminelët më të këqij pedofilë në Gjermani. Tërheqja e tij ndaj djemve të rinj daton që nga fëmijëria e tij, sipas një psikiatri në Mynih i cili takoi vrasësin serial. Në moshën 8 vjeç, Martini i vogël u ngacmua nga një kushëri i së njëjtës moshë.
Si adoleshent, ai kreu krimet e tij të para, mashtrime dhe madje edhe një përpjekje për zhvatje. Në moshën 18 vjeç, Martin Ney dyshohet se sulmoi një djalë 8-vjeçar në një pishinë, duke e interpretuar mosveprimin e viktimës së tij si pëlqim. Vitet kaluan. Ky burrë i vetmuar, i pasigurt në marrëdhëniet e tij me të rriturit e tjerë, u bë një grabitqar fëmijësh në fillim të viteve 1990.
Vepronte kryesisht në veri të vendit, në kampe shkollore, shkolla me konvikt dhe madje edhe në shtëpi familjare, ku hynte me forcë për të befasuar viktimat e tij të reja ndërsa flinin. Ai iu uronte “natën e mirë” pasi i abuzonte seksualisht.
Ky kriminel guxon të kthehet në vendet e krimeve të tij dhe di si t’i mbulojë gjurmët e tij. Tre nga këta djem u rrëmbyen, u përdhunuan dhe u vranë. Pse t’i vriste? Nga frika se mos identifikoheshin dhe për të fshehur tendencat e tij pedofile, shpjegoi vetë Martin Ney. Gjithashtu nga frika e reagimit të nënës së tij pasi të dilte e vërteta, vuri në dukje psikiatri i Mynihut.
Martin Ney studioi për t’u bërë punonjës social. Në atë kohë, ky burrë beqar, i cili jetonte në një apartament studio, aplikoi në shërbimet sociale të Bremenit për t’u bërë prind kujdestar. Me mungesë kujdestarësh të mundshëm, atij iu besua në vitin 1996 kujdesi për një djalë 12-vjeçar që jetoi me të deri në moshën 18 vjeç. Sipas djalit, ai nuk u abuzua kurrë nga burri që media e quajti “Burri me të Zeza” ose “Burri me Maskë”.
