Pas denoncimit të bërë në emisionin investigativ “Tak Fak” nga qytetari Arben Ziu, i cili ngriti alarmin për një ndërtesë pa leje mbi një bunker në qendër të Durrësit që po i shkatërron banesën nga lagështira, gazetarët kanë zbritur në terren për të kërkuar llogari pranë institucioneve përgjegjëse.

Rrugëtimi për të gjetur drejtësi ka nisur në Drejtorinë e Policisë së Durrësit. Së bashku me denoncuesin, “TakFak” ka kërkuar informacion zyrtar mbi hapat e ndërmarrë për këtë rast. Pas disa minutash pritjeje, kryeinspektori i zonës, Gëzim Bahja, ka komunikuar në telefon duke e shmangur përgjegjësinë dhe duke u shprehur se për këtë çështje kompetente është vetëm Inspektorati i Mbrojtjes së Territorit (IMT) Durrës.

Të njëjtin qëndrim ka mbajtur edhe zëdhënësja për shtyp e Policisë së Durrësit, Majlinda Zeneli. Ajo deklaroi se institucioni i policisë e ka kryer procedurën e saj, pasi çështja është referuar tashmë nga IMT-ja në Prokurori, dhe se për detaje të mëtejshme duhet t’i drejtohen organit të akuzës.

Përballë kësaj situate ku institucionet “ia pasojnë topin” njëri-tjetrit, “TakFak” u zhvendos pranë zyrave të IMT-së në Durrës. Ndonëse kryeinspektori Klajdi Lame nuk ndodhej në zyrë në ato momente, gazetarët u pritën nga juristja e institucionit. Kjo e fundit pranoi se nuk kishte dijeni për rastin specifik të zotit Arben, por mori përsipër të verifikonte me urgjencë të gjithë dokumentacionin përkatës.

Reagimi zyrtar dhe vendimtar ka ardhur pak më vonë nga vetë kreu i IMT-së Durrës, Klajdi Lame. I vënë përballë fakteve të pakundërshtueshme të emisionit dhe urdhrit të mëparshëm të paprezantuar, Lame ka dhënë një premtim të prerë publik:

“Brenda një afati prej dy javësh, IMT do të zbresë në terren dhe do të ekzekutojë vendimin për prishjen e shkallëve pa leje të objektit,” u shpreh kryeinspektori Lame.

Ky vendim pritet t’i rikthejë distancën ligjore banesës së qytetarit Arben Ziu dhe të lejojë rindërtimin e kupolës së bunkerit, duke i dhënë fund makthit shumëvjeçar të lagështirës që po i shkatërronte pronën.