Departamenti Amerikan i Shtetit i ka bërë thirrje Rusisë që të ndalojë mizoritë e saj në Ukrainë dhe t’i japë fund një lufte që nuk ka asnjë shans ta fitojë, pavarësisht se çfarë krimesh kryejnë forcat e saj kundër ukrainasve paqësorë.

Zëvendës-zëdhënësi kryesor i Departamentit të Shtetit, Vedant Patel, e tha këtë në një konferencë të premten.

“Ne i bëjmë thirrje urgjentisht Rusisë që të tërheqë forcat e saj nga Ukraina për t’i dhënë fund një lufte të panevojshme që ajo nuk mund dhe nuk do ta fitojë, pavarësisht se sa të neveritshme dhe të dëshpëruara janë taktikat e saj,” tha ai.

Ai vuri në dukje se ekziston vetëm një vend, Rusia që po zhvillon një luftë të paprovokuar, të paramenduar të zgjedhur, me shpërfillje të qëllimshme për të drejtat e njeriut.

Patel tërhoqi vëmendjen te raporti i fundit i programit të Observatorit të Konfliktit që detajon raste të shumta që tregojnë ndalime të padrejta, zhdukje në Kherson nga duart e forcave ruse gjatë luftës së saj brutale.

“Sot, ne përsërisim përsëri thirrjen tonë për Rusinë që të ndalojë operacionet e saj të filtrimit, shkeljet dhe abuzimet e të drejtave të njeriut, shkeljet e saj të ligjit ndërkombëtar humanitar dhe shkeljen e Kartës së OKB-së,” tha ai.

Ai shtoi gjithashtu se Shtetet e Bashkuara mbeten “të palëkundura në mbështetjen e saj për qeverinë dhe popullin e Ukrainës, pasi ata mbrojnë vendin dhe lirinë e tyre”.