Konflikti në Lindjen e Mesme ka hyrë në ditën e 49-të, ndërsa përpjekjet për armëpushim dhe negociata vijojnë.

Një armëpushim 10-ditor midis Libanit dhe Izraelit, i shpallur nga Presidenti amerikan Donald Trump, ka hyrë në fuqi. Megjithatë, vetëm disa orë më vonë, ushtria libaneze akuzoi Izraelin për “shkelje” të marrëveshjes.

Izraeli ka qenë i përfshirë në luftime të ashpra me Hezbollahun, grupin e mbështetur nga Irani, që prej fillimit të konfliktit rajonal. Trump ka ftuar drejtuesit e të dy vendeve për bisedime në Shtëpinë e Bardhë, në një përpjekje për të stabilizuar situatën.

Në planin diplomatik, një zyrtar iranian bëri të ditur se janë arritur disa përparime në bisedimet mes Shtetet e Bashkuara dhe Irani, të ndërmjetësuara nga Pakistani.

Megjithatë, mbeten ende “çështje shumë të diskutueshme”, sidomos lidhur me programin bërthamor të Teheranit.

Trump deklaroi se SHBA-të kanë tani një “marrëdhënie shumë të mirë” me Iranin dhe se palët “po merren vesh shumë mirë”. Sipas raportimeve, një raund i dytë bisedimesh pritet të zhvillohet në Islamabad, kryeqytetin pakistanez.

Pavarësisht toneve më optimiste në diplomaci, paralajmërimet ushtarake nuk mungojnë. Sekretari amerikan i Mbrojtjes Pete Hegseth deklaroi se SHBA-të janë “të përgatitura dhe të ngarkuara”, duke theksuar se situata po monitorohet nga afër.

Ndërkohë, gjenerali Dan Caine shtoi se ushtria amerikane është “gati të rifillojë operacionet luftarake në çdo moment”, duke lënë të kuptohet se armëpushimi mbetet i brishtë.