Austria ka mposhtur Kosovën me rezultatin 3-1 në ndeshjen e dytë të Grupit në Ligën B të Ligës së Kombeve, duke bërë që “Dardanët” të provojnë shijen e humbes së pare në këtë edicion të Nations League. Të besuarit e teknikut Franco Foda e nisën mirë takimin dhe patën mundësi për të kaluar në avantazh, por nuk arritën t’i shfrytëzonin rastet e krijuara.

Austria zhbllokoi sfidën në minutën e 23-të me David Affengruber, i cili shënoi me kokë pas një goditjeje dënimi. Në fund të pjesës së parë, Junior Adamu dyfishoi avantazhin e austriakëve pas një kundërsulmi të shpejtë.

Trajneri Franco Foda reagoi në pushim me tri zëvendësime, duke aktivizuar edhe Edon Zhegrovën. Kosova u shfaq më kërkuese në pjesën e dytë dhe pati një mundësi të mirë me Vedat Muriqin, por portieri austriak bëri një pritje të shkëlqyer.

Në minutën e 61-të, Austria shënoi edhe golin e tretë me Carney Chukwuemeka, duke përfituar edhe nga një dalje e pasigurt e Aro Muric. Portieri kosovar u dëmtua pak minuta më vonë dhe u zëvendësua nga Amir Saipi.

Kosova arriti të shënonte golin e nderit në minutën e 83-të. Edon Zhegrova ishte i saktë nga pika e bardhë, pas një penalltie të fituar për prekje me dorë brenda zonës.

Në fund, Austria festoi fitoren 3-1, ndërsa Kosova do të kërkojë pikët e radhës në transfertën ndaj Izraelit. Austria, ndërkohë, do të përballet me Irlandën.

Pas ndeshjes tekniku gjerman i “Dardanëve” Foda u shpreh: “E nisëm shumë mirë takimin dhe duhej te ishim ne të parët që duhej të kishim shënuar që në fillim.. Mendoj se momenti që ndryshoi ndeshjen ishte goli për 2-0, para përfundimit të pjesës së parë. Aty nuk u mbrojtëm mirë, nuk ishim vendosur mirë dhe ata e shfrytëzuan në mënryën e duhur. Megjithatë, ne nuk u dorëzuam dhe provuam deri në fund për të ndryshuar shifrat e ndeshjes”, tha Foda.