Akademiku Artan Fuga ka ironizuar me deklaratat e Edi Ramës për Portin e ri të Durrësit që pritet të ndërtohet nga investitorët e Emirateve të Bashkuara.

Ai thotë se dëgjoi nga kryeministri që duan ta bëjnë Portin e Durrësit nga më të mëdhenjtë në Mesdhe, por jo gjithmonë madhësia për akademikun është e mirë.

Sipas tij Shqipërisë i duhen gjëra të vogla, hipermoderne duke ndjekur shembullin e Holandës, Danimarkës apo Belgjikës.

Madje Fuga kërkon një debat mes krerëve të politikës, pasi sipas tij nga këto plane e deklarata për Durrësin po dridhet edhe Torra, duke ironizuar se është edhe zonë tërmetesh.

STATUSI NGA ARTAN FUGA

Durrësi si Dubai ?

Dëgjova që porti i Durrësit kanë projekt ta kthejnë më të madhin në Mesdhe. Investime nga ata që kanë bërë gjërat më të mëdha të kësaj bote. Si porti i Dubait!

Po, mirë mo, mirë shumë, me hajër!

Por nuk kuptoj se përse na duhet një gjigandomani e tillë? Se madhësia jo gjithmonë është e mirë më vete! Janë bërë llogaritë kush do hyjë dhe dalë që andej! I madh dhe i thellë për çfarë? Se mos na e kthen gjithë zonën në depo karburantesh, Durrësin në magaze mallrash, dhe zonën Kashar – Tiranë në parking kamionash!

Ne na duhen gjëra të vogla, hipermoderne, për zhvillimin tonë! Pse budallaqe janë Hollanda, Danimarka, Belgjika, etj., që nuk bëhen si Dubai.

Unë e di se çfarë ndodh, por do prisja një debat për këtë çështje mes krerëve të politikës! Të marrim vesh, se po dridhet edhe Torra në Durrës, apo nuk është zona tërmetesh!

(BalkanWeb)