Prokuroria e Fierit ka sekuestruar rreth 2.6 milionë euro në llogari bankare, si dhe një automjet luksoz tip “Bentley”, në kuadër të hetimeve për falsifikimin e dokumenteve dhe pastrimin e produkteve të veprës penale. Sekuestro ka ardhur në kuadër të hetimeve për falsifikimin e pronësisë mbi sipërfaqen prej 1143 hektarësh në Seman, ku Hasko dyshohet se tokën e përvetësuar ua shiti dy kompanive të ndryshme.

Pasuritë i përkasin shtetasit Kastriot Hasko, i cili ndodhet aktualisht nën masën e sigurisë “Arrest në shtëpi”. Emri i tij doli edhe pas përplasjes mes biznesmenëve Luan Muça dhe Vasil Bedinaj në Vlorë për një pronë në bregdetin e Palasës. Kastriot Hasko rezulton se ka lidhur marrëveshje përqindjeje me Bedinaj mbi pronën e Luan Muçës.

Sipas Prokurorisë së Fierit, Kastriot Hasko dyshohet se, përmes vendimeve të falsifikuara, ka arritur të regjistrojë sipërfaqe të konsiderueshme toke në zonën e Semanit. Në vijim të hetimeve, janë sekuestruar llogari bankare me një vlerë prej 2,610,195 euro, 1,865,076 lekë dhe 7,515 dollarë amerikanë.

Gjithashtu, është sekuestruar një automjet tip “Bentley Flying Spur”, i vitit të prodhimit 2024, me vlerë blerjeje të deklaruar prej 250 mijë eurosh. Sipas Prokurorisë, pasuritë e sekuestruara dyshohet se janë produkte të veprave penale që janë objekt i hetimit në këtë procedim. Kastriot Hasko është nën akuzë për veprat penale “Falsifikimi i dokumenteve” dhe “Pastrimi i produkteve të veprës penale ose i veprimtarisë kriminale”, të parashikuara nga nenet 186/2 dhe 287 të Kodit Penal.

Për skandalin e falsifikimit të dokumenteve të pronësisë janë arrestuar edhe dy prej ish-krerëve të Kadastrës së Fierit, Ertis Shehu dhe Bardh Kapaj.

NJOFTIMI I PROKURORISE
Hetimet mbi falsifikimin e pronave, Prokuroria e Fierit sekuestron 2.6 milionë euro llogari bankare të shtetasit K.H., dhe një ‘Bentley’
Me vendim të Prokurorisë pranë Gjykatës së Shkallës së Parë të Juridiksionit të Përgjithshëm Fier, u sekuestruan 2.6 milionë euro në llogari bankare si dhe një automjet tip ‘Bentley’ të shtetasit K.H., nën akuzë për veprat penale “Falsifikimi i dokumenteve” dhe “Pastrimi i produkteve të veprës penale ose i veprimtarisë kriminale”, parashikuar nga nenet 186/2 dhe 287 të Kodit Penal.

Ky shtetas, aktualisht me masë sigurimi “Arresti në shtëpi”, nëpërmjet vendimeve të falsifikuara ka arritur të regjistrojë sipërfaqe të konsiderueshme toke. Për rrjedhojë në vijim të hetimeve u sekuestruan:

Llogari bankare me vlera:
– 2,610,195 Euro (dy milion e gjashtëqind e dhjetë e njëqind e nëntëdhjetë e pesë euro);
– 1,865,076 Lek (një milion e tetëqind e gjashtëdhjetë e pesë mijë e shtatëdhjetë e gjashtë lek);
– 7,515 USD (shtatë mijë e pesëqind e pesëmbëdhjetë dollarë amerikanë); si dhe
– Një automjet tip “Bentley” model “Flying Spur”, vit prodhimi 2024, me vlerë blerje të deklaruar 250,000 Euro (dyqind e pesëdhjetë mijë euro), të cilat dyshohen se janë produkte të veprave penale objekt i hetimeve të këtij procedimi penal.

Në vijim, Prokuroria pranë Gjykatës së Shkallës së Parë Juridiksionit të Përgjithshëm Fier shpreh angazhimin e plotë për hetimin, sekuestrimin dhe konfiskimin e pasurive me prejardhje nga veprimtari kriminale.