Shkollat kanë përgjegjësinë për të përgatitur nxënësit, në kuadrin e mbrojtjes civile dhe për mundësinë e luftë. Kështu tha ministrja gjermane e Arsimit Bettina Stark-Wächinger, duke shkaktuar reagime të forta.
“Shoqëria në tërësi duhet të përgatitet siç duhet për krizat – nga një pandemi te fatkeqësitë natyrore dhe lufta,” tha ministrja në një intervistë për gazetat Funke Group. “Mbrojtja civile është jashtëzakonisht e rëndësishme dhe e ka vendin në shkolla. Qëllimi ynë duhet të jetë të forcojmë qëndrueshmërinë tonë”, shtoi Stark-Wächinger dhe mbrojti ushtrimet e mbrojtjes civile në shkolla, duke përmendur Britaninë si shembull.
“Ushtrimet e fatkeqësive janë pjesë e jetës së përditshme atje dhe ne mund të mësojmë nga kjo. “Të rinjtë duhet të jenë të vetëdijshëm për kërcënimet ndaj lirisë së tyre dhe të jenë në gjendje të përballen me rreziqet, dhe shkollat kanë për detyrë t’i tregojnë rreziqet në një mënyrë të përshtatshme për moshën, por edhe të ndihmojnë në përballimin e ankthit dhe frikës”, theksoi ajo, duke sqaruar se nuk do të ishte një kurs i ri, por për t’i shtuar përmbajtje atyre ekzistuese.
Ministrja e Arsimit u bëri thirrje gjithashtu shkollave në Gjermani të zhvillojnë një marrëdhënie “të qetë” me forcat e armatosura, me vizita nga oficerët që do të marrin përsipër të shpjegojnë saktësisht se çfarë bën Bundeswehr për sigurinë e qytetarëve. Megjithatë, në përgjigje të një pyetjeje, ajo hodhi poshtë sugjerimet për rikthimin e shërbimit të detyrueshëm ushtarak. “Ai u hoq sepse nuk konsiderohet më i pranueshëm nga pikëpamja kushtetuese,” vuri në dukje ajo, duke theksuar se “vëmendja nuk duhet të shpërqendrohet nga ajo që është me të vërtetë e nevojshme në këtë kohë, që është pajisja e Bundeswehr-it që të jetë në gjendje të mbrohet.”. Nga ana e Partisë Social Demokrate (SPD), kryetarja e Konferencës së Ministrave të Arsimit të Landeve, Christine Streichert-Klievot, e quajti propozimin e ministres së Arsimit “shumë kufizues”. “Fëmijët dhe të rinjtë duhet të përgatiten më gjerësisht për të ardhmen.
(BalkanWeb)
