Drejtori i Përgjithshëm Ekzekutiv i Autoritetit të Mbikëqyrjes Financiare, Ervin Mete, zhvilloi një takim me Drejtuesen e re të misionit të Fondit Monetar Ndërkombëtar për Shqipërinë, Yan Sun, përmes platformës virtuale të komunikimit Webex.
Në takim u diskutua në lidhje me zhvillimet më të fundit në tregjet nën mbikëqyrjen e Autoritetit dhe impaktin e pandemisë së COVID-19. Mete u shpreh se tregu i sigurimeve rezultoi më i ekspozuari nga efektet e koronavirusit, edhe pse pritet që rihapja të sjellë normalizimin e treguesve financiarë për shoqëritë e sigurimit.
Drejtori i Përgjithshëm Ekzekutiv i AMF-së theksoi se miratimi së fundmi i tre ligjeve të reja nga Kuvendi i Shqipërisë, “Për sipërmarrjet e investimeve kolektive”, “Për tregjet e kapitalit” dhe “Për tregjet financiare bazuar në teknologjinë e regjistrave të shpërndarë” pritet të modernizojë funksionimin e këtyre tregjeve dhe të kontribuojë në zhvillimin ekonomik të vendit.
Mete e cilësoi dixhitalizimin si një sfidë kryesore të Autoritetit në kushtet e reja të krijuara si pasojë e COVID-19, për të siguruar raportimin në kohë reale të të dhënave për të gjitha subjektet nën mbikëqyrje, por edhe në funksion të komunikimit ndërinstitucional dhe lehtësimit të procedurave për qytetarët.
Drejtuesja e misionit të Fondit Monetar Ndërkombëtar, Znj. Yan Sun vlerësoi rolin e AMF në mbikëqyrjen e tregjeve financiare jobankare, si edhe shprehu gadishmërinë për të vijuar asistencën për Autoritetin, përmes ekspertizës, edhe në kuadër të ligjeve te reja te miratuara se fundmi.
(BalkanWeb)
