Kancelari gjerman Olaf Scholz është deklaruar në lidhje me paketën e gjashtë të sanksioneve që Bashkimi Europian do të miratojë si reagim ndaj Moskës pas nisjes së agresionit në Ukrainë.

Ai ka sqaruar se paketa e gjashtë e sanksioneve do të ndikojë në zhvillimin dhe prosperitetin ekonomik rus.
“Sanksionet kanë një objektiv të qartë, të bëjnë Rusinë t’i japë fund kësaj lufte dhe të tërheqë trupat e saj dhe të arrijë në një marrëveshje me Ukrainën për një paqe të arsyeshme dhe të drejtë”, tha Scholz gjatë një konference për shtyp të martën pas një takimi të jashtëzakonshëm të Këshillit Evropian.

Ai shpjegoi se rreth 90 për qind e importeve të naftës në Evropë mbulohen nga embargoja.

“Një përjashtim për naftën e tubacionit që dërgohej në disa vende në Evropë mundësoi një marrëveshje të përbashkët. Kjo ishte e rëndësishme sepse masat kalimtare që duhet të marrin këto vende nuk kanë qenë në gjendje të finalizohen kaq shpejt. Gjermania dhe Polonia po vazhdojnë përpjekjet e tyre për t’u bërë të pavarur nga nafta ruse deri në fund të vitit “, tha kancelari gjerman.

Scholz shtoi se një embargo e gazit në mbarë Evropën nuk është ende e arritshme pasi shumë vende do të mbeten të varura nga gazi rus shumë më gjatë se Gjermania.

“Gjermania po bëhet me shpejtësi e pavarur nga importet e gazit duke ndërtuar infrastrukturë për të mundësuar importin e gazit nga vendet e tjera me anije. Disa investime do të bëhen shumë shpejt, kështu që shpresojmë që tashmë do të ketë ndryshime të rëndësishme në kthesën e vit, por disa gjëra do të zgjasin më shumë. Por një gjë është shumë e qartë nga këndvështrimi im: shumë vendeve do të kenë nevojë për më shumë kohë se Gjermania”. U shpreh ai.

Kancelari gjerman fajësoi Rusinë për krizën e afërt të ushqimit, e cila mund të krijohet si pasojë e bllokimit të drithërave ukrainase të bllokuar në vend.

“Përgjegjësia qëndron qartë tek Rusia dhe presidenti i saj,” tha Scholz.

(BalkanWeb)