Kryetarja e LSI Monika Kryemadhi me anë të një deklarate për mediat tha se fermerët shqiptarë do të protestojnë të mërkurën kundër politikave qeveritare.

Kryemadhi u shpreh se kjo qeveri po grabit bujqit, kurse shton se paratë e tyre qeveria i dërgon për PPP dhe te oligarkët.

Monika Kryemadhi: Fermerët të subvencionohen. Qeveria të kryejë detyrat e saj. Fermerët do të dalin të mërkurën për të protestuar. Sot shqiptarët kanë një qeveri që ka ardhur në pushtet nga krimi i organizuar dhe nga oligarkët, që e kanë kthyer qeverinë në shërbim të interesave të tyre. Kjo qeveri me paaftësinë e saj i ka krijuar dëm eksporteve shqiptare.

Sot fermerët kanë kuptuar që kanë të bëjnë me një qeveri të paaftë. Kjo qeveri ka për inspirim grabitjen.  Kjo qeveri vepron në mënyrë makute, duke mos subvencionuar ata persona që ngrihen që me natë për të bërë produkte bujqësore. TVSH në masën 6 për qind iu la treg të lirë importeve të huaja. Sot qeveria ka në mendje vetëm PPP, ku paratë shkojnë për oligarkët. Numri i kamionëve me perime dhe të tjera mallra janë ulur tejet masa. Qeveria ka goditur fermerët shqiptarë. Kjo qeveri do vetëm skllevër modernë, pa gjuhë e pa krenari. Në emër të LSI mbështesim protestën e fermerëve të mërkurën. Me këtë deklaratë, dua të them se do të shohim çdo polic në veprimet që kryejnë.

Fjala e plotë e Monika Kryemadhit:

Sot jam në këtë komunikim mediatik për të shprehur mbështetjen e plotë, timen dhe të LSI, jemi këtu për të garantuar të gjithë fermerët shqiptarë për kërkesat e drejta që ato kanë parashtruar. Kërkesat e fermerëve janë minimale. Ata po kërkojnë rregullat e lojës të cilat i kanë pasur dy vite më parë, nuk po kërkojnë asgjë më shumë.

Kërkesat e fermërëve janë shumë të thjeshta për t’i kuptuar edhe për t’i realizuar. Fermerët shqiptarë kërkojnë subvencionim sipas prodhimit. Metodë të cilën e ndjekin të gjithë vendet fqinjë, të cilët janë edhe konkurrentët direkt të fermerëve tanë. Vlerësim dhe kompensim financiar me çmim dysheme të tregut për produktet e humbura nga fatkeqësi të mëdha natyrore dhe nga stoku i prodhimeve të shkaktuara nga çrregullimi i tregut.

Barazimin e TVSH për produktet bujqësore, si në shitje ashtu edhe në blerje. Kërkojnë nga drejtoria bujqësore dhe Ministria, që është thjesht në një fasadë, dhe që është në shërbim të plotë të monopolistëve të importeve bujqësore dhe të imputeve të bujqësisë, që të bëjnë punën e tyre sipas ligjit atë çfarë i takon, t’iu shërbejë fërmerëve dhe blegtorëve tanë. Të bëjnë analiza, kontrolle, monitorime për tokën, plehrat dhe farërat. Dhe të ndërtojë një laborator të akredituar që eksportet shqiptare të garantohen përballë sulmeve nga agjencitë e shteteve konkurrente.

Kërkojnë me një lutje shumë të thjeshtë ndaj qeverisë të kryejë detyrën e saj. Të bëjë rregullime me ligj të kushteve dhe mënyrën e kryerjes së tregëtisë me produktet bujqësore. Këto janë kushtet që fermerët shqiptarë kanë paraqitur dhe do të dalin ditën e mërkurë për të protestuar. Është një nga protestat e cila ka ndodhur disa herë brenda këtyre ditëve. Sot shqiptarët kanë një qeveri e cila ka ardhur në pushtet me votat e mbledhura nga presioni dhe intimidimi i votuesve, nga krimi i organizuar dhe blerja me paratë e PPP të oligarkëve, të cilët e kanë kthyer qeverinë në shërbim të interesave të tyre.

(d.xh/Balkanweb)