Fituesja pakistaneze e Çmimit Nobel për Paqen, Malala Yousafzai, u ka bërë thirrje Pakistanit dhe Indisë të ulin tensionet.

“Urrejtja dhe dhuna janë armiqtë tanë të përbashkët”, shkroi ajo në X. “U bëj thirrje fuqimisht udhëheqësve në Indi dhe Pakistan që të ndërmarrin hapa për të ulur tensionet, për të mbrojtur civilët – veçanërisht fëmijët – dhe për t’u bashkuar kundër forcave të përçarjes.”

Ajo shprehu ngushëllimet e saj për të dashurit e viktimave në të dyja anët e kufirit dhe i kërkoi bashkësisë ndërkombëtare të nxisë dialogun dhe diplomacinë.

“Po mendoj për të gjithë miqtë dhe familjen time – dhe të gjitha edukatorët, avokatët dhe vajzat me të cilat punojmë – në Pakistan gjatë kësaj kohe të rrezikshme”, tha ajo, duke shtuar se paqja është “e vetmja rrugë përpara për sigurinë dhe prosperitetin tonë kolektiv”.

Në tetor të vitit 2012, Yousafzai u qëllua në kokë nga talebanët ndërsa udhëtonte me autobus për t’u kthyer nga shkolla në shtëpi. Në ditët që pasuan sulmin, Yousafzai u transportua me helikopter në spital në Birmingham të Anglisë, për një ndërhyrje kirurgjikale që i shpëtoi jetën. Tani me banim në Britani, aktivistja që atëherë ia ka kushtuar jetën e saj të punës fushatës për të drejtat arsimore për vajzat dhe gratë në të gjithë botën nën ombrellën e organizatës ndërkombëtare jofitimprurëse Malala Fund.

(A.A/BalkanWeb)