TIRANË- Kandidati i Partisë Demokratike për kryetar Bashkie të Tiranës, Halim Kosova, është takuar me fermerë të zonës së Pezës, ku ka dëgjuar shqetësimet dhe kërkesat e tyre. Banorët sollën në vëmendje mungesat që kanë, kryesisht, u ndalën tek pamundësia për të shitur mallin që prodhojnë, ndërsa Kosova premtoi treg të organizuar, dhe komunikim të drejtpërdrejtë me ta për hallet dhe shqetësimet.
“Çdo zonë në Tiranë ka karakteristikë të vetën një, dy, tre, pesë prodhime. Por cili është ai që s’do më të mirën, por duhet një arbitër që ti kombinojë këto gjëra, në mënyrë që Bashkia t’u rregullojë lehtësira në punën tuaj të përditshme, t’u rregullojë rrugët e komunikimet sepse në fund të fundit duhet transportuar diçka, të rregullojë linjën se si kjo do të shkojë tek qytetari. Ti e prodhon perfekt dhe je i detyruar ta shesësh në kushte mizerabël. Kjo ta humb vlerën e djersës tënde se po i njëjti mall është. Kjo është një ide që ne po e diskutojmë dhe do ta diskutojmë edhe më në hollësi bashkë, pra ndërtimi i tregjeve dhe i rrugëve se si ju t’i bini në mënyrë të organizuar. Unë mendoj që kjo do të jetë një nga prioritetet e mia”, tha Kosova.
Banorët e zonës shprehën shqetësimet e tyre për kushtet bazike të jetesës. “Kemi 1 kilometër e pak rrugë që gjatë dimrit as kafshët nuk kalojnë jo më makinat”, pohon një banor.
“Jemi në rrëzë të Tiranës dhe nuk kemi ujë të pijshëm. Ka humbur shpresa, ka vdekur shpresa”, shprehet tjetër.
Kosova u angazhua para tyre për punë dhe komunikim të drejtpërdrejtë për hallet e tyre.
“Nëqoftëse do të kem mundësi të bëj 10 gjëra, ta dini që 5 do deklaroj. Ato të pesta do i bëj se s’bën”, u shpreh Kosova. Kandidati i PD për Bashkinë e Tiranës theksoi se transparenca dhe mbajtja e kontaktit me qytetarin do të jenë si gur themeli në aktivitetin e tij.
“Puna e parë është transparenca. Unë dua të bëj një sistem transparence ku çdo njeri, çdo qytetar i kësaj zone të madhe që po bëhet gati 1/3 e Shqipërisë, ta dijë se ku po shkojnë lekët e veta. Ku shkojnë taksat. U grumbulluan kaq lekë. Me këto lekë do bëhet kjo, do bëhet kjo. Dy gjëra kam si qëllim unë. Ekspertët padyshim që i kam në një krahë por qytetari dhe fshatari që është direkt, nuk e zgjidhën këtu problemin, komunikim direkt. Ky do jetë një nga prioritetet e mia, si të lidhem me qytetarin. Të gjithë bashkërisht do bëjmë diçka për të ecur në rrugën e duhur”, tha Kosova.
(m.k/BalkanWeb)
