Sekretari amerikan i Mbrojtjes, Pete Hegseth, u ka kërkuar ligjvënësve në Kongres miratimin urgjent të një pakete shtesë financimi prej 67 miliardë dollarësh për Pentagonin, duke argumentuar se fondet janë të domosdoshme në kushtet e konfliktit me Iranin.

Gjatë një seance dëgjimore në Kongres, Hegseth theksoi se ushtria amerikane përballet me nevoja të menjëhershme logjistike dhe operacionale, ndërsa kërkoi fonde shtesë për të mbështetur misionet ushtarake.

Sipas tij, paketa përfshin 1.5 miliardë dollarë për të përballuar mungesat kritike të karburantit, të nevojshëm për operacionet ushtarake, si dhe 2 miliardë dollarë për zëvendësimin e pajisjeve të humbura ose të dëmtuara gjatë luftimeve.

Kërkesa e kreut të Pentagonit vjen në një kohë kur situata e sigurisë në Lindjen e Mesme mbetet e paqartë dhe administrata amerikane po përgatitet për skenarë të ndryshëm që lidhen me konfliktin me Iranin. Paketa prej 67 miliardë dollarësh synon të garantojë gatishmërinë operacionale të forcave të armatosura amerikane dhe mbështetjen e misioneve të tyre.