Policia e Shtetit me anë të një njoftimi për mediat ka vënë në dispozicion fotografinë e shtetasit Gëzim Saraçi, personi që hodhi granatë dore në Bashkinë e Lushnjës, duke plagosur kryetarin dhe sekretaren.

Në njoftimin e policisë thuhet se Saraçi, menjëherë pasi ka kryer plagosjen e dyfishtë, është larguar në drejtim të paditur. Policia vë në dispozicion të qytetarëve, numra telefoni ku të gjithë ata që kanë informacion për vendndodhjen e Saraçit mund të telefonojnë.

Po ashtu, Policia thotë se ka vënë në dispozicion një shumë prej 1 milionë lekë të rinj për çdokënd që jep informacion për vendndodhjen e 50 vjeçarit.

Njoftimi i policisë:

Policia e Shtetit

Në lidhje me ngjarjen e ndodhur në Bashkinë e Lushnjës, ku shtetasi Gëzim Saraçi, 50 vjeç, hodhi në zyrën e Kryetarit të Bashkisë Lushnjë një granatë dore dhe për pasojë u plagosën jashtë rrezikut për jetën Kryetari i Bashkisë F. T. dhe sekretarja e Bashkisë shtetasja E. Q., ju informojmë se forcat speciale Renea, FNSH-ja e Fierit, shërbimet e Komisariatit të Policisë Lushnjë dhe të DVP Fier vijojnë krehjen e zonës, për kapjen e autorit të kësaj ngjarjeje.

Autori i kësaj ngjarjeje ka mundur të largohet menjëherë pas ngjarjes dhe dyshohet se është fshehur në territorin e qarkut Berat.

Me qëllim kapjen sa më shpejt të tij, Policia e Shtetit kërkon bashkëpunimin e qytetarëve dhe vë në dispozicion 1 milionë lekë të rinj për çdo informacion të saktë që do çojë në lokalizimin dhe kapjen e autorit.

Për çdo informacion sado të vlefshëm, qytetarët të telefonojnë në numrin unik 112 apo të dërgojnë imazhe në Komisariatin Dixhital, si dhe në numrin e celularit 069 41 07 337, duke ju garantuar anonimat të plotë dhe reagim të menjëhershëm të strukturave të Policisë për të kapur dhe vënë para përgjegjësisë ligjore autorin e kësaj ngjarjeje.

(d.xh/ Balkanweb)