Christa Pike, e dënuara me vdekje në SHBA, ka bërë deklaratën e saj të parë publike që nga tentativa e dështuar për ekzekutimin e saj në shtator. 50-vjeçarja deklaron se vijon të vuajë dhimbje të forta fizike dhe psikologjike, pasi i mbijetoi dy injeksioneve vdekjeprurëse me pentobarbital.
“Nuk ka pasur asnjë moment që nga ajo natë kur nuk kam pasur dhimbje. Më dhemb trupi, krahët, duart dhe fyti. Ende e kam të vështirë të flas. Dhe dhimbja nuk është vetëm fizike. Ka dhimbje në mendjen dhe në shpirtin tim”, u shpreh Pike në deklaratën e saj.
Ajo u lirua nga spitali në fund të muajit të kaluar, pasi kishte kaluar në gjendje kritike shëndetësore pas tentativës për ekzekutim. Më pas u rikthye në burgun ku ka kaluar rreth 30 vitet e fundit.
Avokatët e saj kanë bërë të ditur se Pike ka vuajtur nga pneumonia, ënjtje të konsiderueshme në krahë dhe vështirësi në gëlltitje.
“Po shërohem dhe e di që po bëhem më e fortë. Por shërimi nuk është i njëjtë me të qenit mirë”, tha ajo.
Christa Pike u dënua me vdekje për vrasjen brutale të 19-vjeçares Colleen Slemmer në vitin 1995, kur ishte vetëm 18 vjeçe. Ajo dhe i dashuri i saj i atëhershëm, Tadaryl Shipp, e rrahën dhe torturuan viktimën, të cilën e kishin njohur në një kamp trajnimi profesional për të rinj.
Shipp gjithashtu u dënua për krimin, por i shpëtoi dënimit me vdekje pasi në kohën e ngjarjes ishte i mitur. Ai vijon të vuajë dënimin me burg.
Tentativa e dështuar për ekzekutimin e Pike tronditi opinionin publik në SHBA dhe riktheu debatin mbi përdorimin e injeksioneve vdekjeprurëse dhe mënyrën e zbatimit të dënimit kapital.
Bethany Mann, një mike e Pike dhe themeluese e organizatës Child Arise Tennessee, e cila mbështet fëmijët dhe familjet e prekura nga burgosja e prindërve, tha për BBC se kishte qenë në kontakt të drejtpërdrejtë me të që prej incidentit.
Ndërkohë, guvernatori i Tenesit, Bill Lee, pezulloi të gjitha ekzekutimet për pjesën e mbetur të vitit dhe urdhëroi një hetim të pavarur për të përcaktuar se çfarë shkoi gabim gjatë procedurës.
I pyetur nëse Pike mund të përballet me një tjetër tentativë ekzekutimi, Lee deklaroi se pret që dënimi i saj të mbetet në fuqi, përveç rastit kur gjykatat vendosin ndryshe.
Departamenti i Korrektimit i Tenesit nuk ka dhënë ende një shpjegim për dështimin e procedurës, por ka mbrojtur metodën e përdorur.
Nëna e viktimës, May Martinez, e cila kishte kërkuar ekzekutimin e Pike dhe ishte e pranishme gjatë tentativës së dështuar, e cilësoi atë një “rrëmujë”. Ajo deklaroi se shteti i detyrohet një falje, duke theksuar se kërkesa e saj kishte qenë vetëm për drejtësi.
Pike ishte gruaja e parë që pritej të ekzekutohej në Tenesi pas më shumë se 200 vitesh.
Rasti i saj nuk është i vetmi që ka ngritur pikëpyetje mbi procedurat e ekzekutimit në këtë shtet. Në maj të vitit 2026, ekzekutimi i Tony Carruthers u shty pasi personeli nuk arriti të gjente një venë për administrimin e injeksionit vdekjeprurës. Atij iu dha një shtyrje njëvjeçare nga guvernatori.
Sipas Qendrës së Informacionit për Dënimin me Vdekje, më shumë se një e treta e ekzekutimeve në SHBA gjatë vitit 2022 ishin të dështuara ose shoqëroheshin me probleme serioze.
Rasti i Christa Pike ka rikthyer në qendër të vëmendjes debatin mbi dënimin me vdekje në Shtetet e Bashkuara, ndërsa mbetet e paqartë se kur dhe në çfarë rrethanash mund të zbatohet sërish dënimi ndaj saj.
