FSHF ka dënuar dhunën ndaj asistentit të gjyqtarit, Enis Pulaj gjatë ndeshjes Delvina-Albpetrot që solli dhe shtyrjen e saj.
Sipas FSHF, do të caktohet një inspektor disipline për të hetuar rastin teksa i bën thirrje Policisë e Prokurorisë të ndalojnë shkaktarët e dhunës e t’i çojnë para Prokurorisë.
Ditën e sotme ndeshja Delvina-Albpetrol u pezullua pasi një tifoz nga jashtë stadiumit qëlloi me gurë në kokë asistentin e gjyqtarit, Enis Pulajn që u transportua në spitalin e Sarandës.
NJOFTIMI NGA FSHF
FSHF dënon dhunën e ushtruar ndaj gjyqtarit Elis Pulaj në Delvinë
Federata Shqiptare e Futbollit dënon ashpër dhunën e ushtruar ndaj gjyqtarit Elis Pulaj gjatë ndeshjes Delvina-Albpetroli, e vlefshme për javën e 7-të të Kategorisë së Dytë, Grupi B.
Njëkohësisht, Federata e Futbollit kërkon nga organet ligjzbatuese që të marrin masa të forta për të ndalur aktet e dhunshme, që prishin imazhin e futbollit. Gjithashtu, u bëjmë thirrje Policisë së Shtetit dhe Prokurorisë që veprojnë sa më parë për të ndaluar shkaktarët e dhunës dhe t’i vënë ata para drejtësisë.
Sakaq, Federata Shqiptare e Futbollit do të caktojë një inspektor disipline për të kryer një hetim disiplinor në lidhje me incidentin dhe dhunën ndaj gjyqtarit.
Është e papranueshme që futbolli të penalizohet për shkak të disa individëve të dhunshëm e të papërgjegjshëm.
Federata e konsideron të rëndë ngjarjen e ndodhur në Delvinë e që nuk ka asnjë lidhje me lojën e futbollit dhe frymën e “Fair Play”. Së fundmi kërkojmë nga sportdashësit, që të distancohen nga veprime të tilla të dhunshme, që nuk kanë asnjë lidhje me lojën e bukur të futbollit, por vetëm e dëmtojnë atë
(BalkanWeb)